- బీఆర్ఎస్ ఎమ్మెల్యే అభ్యర్థి పల్లా రాజేశ్వర్ రెడ్డి పిలుపు
జనగామ, వెలుగు : జనగామ లోనే ఉంటూ అభివృద్ధిని పరుగులు పెట్టాస్తానని జనగామ బీఆర్ఎస్ ఎమ్మెల్యే అభ్యర్థి పల్లా రాజేశ్వర్ రెడ్డి అన్నారు. నియోజకవర్గ ప్రజలు ఆశీర్వదిస్తే ఐదేళ్లు సేవకుడిగా ఉంటూ జనగామ సమగ్రాభివృద్ధే ధ్యేయంగా పనిచేస్తానన్నారు. మంగళవారం స్థానిక ఆర్డీఓ కార్యాలయంలో ఆయన నామినేషన్ దాఖలు చేసిన అనంతరం జిల్లా కేంద్రం శివారులోని ఉషోదయ ఫంక్షన్ హాల్లో నియోజకవర్గ ముఖ్య నాయకులతో సమావేశం నిర్వహించారు.
తెలంగాణలో జరుగుతున్న అభివృద్ధిని ఓర్వలేక కాంగ్రెస్ ఆరు గ్యారెంటీల పేరుతో మరో సారి మోసం చేసేందుకు కాంగ్రెస్ ప్రయత్నిస్తోందన్నారు. మూడోసారి బీఆర్ఎస్ను అధికారంలోకి తేవాలని పార్టీ శ్రేణులకు పిలుపునిచ్చారు. ఏ పార్టీకి లేనంత క్రమశిక్షణ గల కార్యకర్తలు ఉన్న పార్టీ బీఆర్ఎస్ అన్నారు. కేసీఆర్ పదేండ్ల పాలనలో 60 యేండ్లలో జరుగాల్సిన అభివృద్ధి జరిగిందన్నారు. సీఎం కేసీఆర్, కేటీఆర్ ఆధ్వర్యంలో చేసిన సంక్షేమ పథకాలను ప్రజల్లోకి మరింతగా తీసుకెళ్లాలని పార్టీ శ్రేణులను కోరారు.
విపక్షాలకు క్షేత్ర స్థాయిలో ఏజెంట్లు లేని పరిస్థితి ఉందని, అయినప్పటికీ బీఆర్ఎస్ క్యాడర్ అప్రమత్తంగా ఉండి గెలిచే వరకు శ్రమించాలన్నారు. ప్రజల సంపూర్ణ సహకారంతో జనగామ ఎమ్మెల్యేగా తప్పకుండా గెలుపొందుతారన్న ధీమా వ్యక్తం చేశారు. జిల్లా కేంద్రంలోని 9వ వార్డుల్లో పల్లా రాజేశ్వర్ రెడ్డి, 24వ వార్డులో పల్లా సతీమణి నీలిమ మంగళవారం సాయంత్రం ఇంటింటి ప్రచారం చేపట్టారు. పల్లా గెలిస్తే జనగామ కనివినీ ఎరుగని రీతిలో అభివృద్ధి చెందుతుందని హామీ ఇచ్చారు. వారి వెంట పార్టీ శ్రేణులు పెద్ద సంఖ్యలో పాల్గోన్నారు.
