సెంట్రల్​ డ్రగ్​ స్టోర్​లో సౌకర్యాలేవీ.. పార్కింగ్​లో ఏరియాలో డ్రగ్​ స్టోర్​ నిర్వాహణ

• మందుల నిల్వకు తప్పని ఇక్కట్లు 
•  పక్కా బిల్డింగ్​ నిర్మాణంలో జాప్యం

జనగామ, వెలుగు : జనగామ జిల్లా సెంట్రల్​ డ్రగ్ స్టోర్​లో కనీస సౌకర్యాలు కరువయ్యాయి. మందుల నిల్వకు రక్షణ లేదు. దుమ్ము, ధూళితో కూడిన తాత్కాలిక గది స్టోర్ కొనసాగుతుంది. మెడికల్​ కాలేజీ రన్​ కావాలంటే తప్పనిసరిగా సెంట్రల్​ డ్రగ్​ స్టోర్​ ఉండాలనే రూల్స్ తో ఆగమేఘాల మీద వీటిని మంజూరు చేసిన సర్కారు పక్కా బిల్డింగ్‌ల నిర్మాణం పై ఫోకస్​ పెట్టలేదు.  ఫలితంగా మందుల నిల్వలకు ఇబ్బంది కలుగుతోంది. జనగామ సెంట్రల్​ డ్రగ్​ స్టోర్​ కలెక్టరేట్​పార్కింగ్​ఏరియాలోని ఓ గదిలో నిర్వహిస్తున్నారు..

 సుమారు ఆర్నెళ్ల క్రితం ఈ సీడీఎస్ మంజూరు కాగా తొలుత జిల్లా హాస్పిటల్ క్వార్టర్స్​లో ఏర్పాటు చేశారు. అప్పట్లో చిన్న గది చాలక పోవడంతో జిల్లా గవర్నమెంట్​హాస్పిటల్, ఎంసీహెచ్​హాస్పిటల్‌లో ఎక్కడ పడితే అక్కడ అన్నట్లు వరండాలు, బాల్కానీల్లో మందుల నిల్వలను పెట్టి పంపిణీ చేపట్టారు. సిద్ధిపేట రోడ్డు చంపక్​ హిల్స్​సమీపంలోని సుశీలమ్మ అనాథాశ్రమంలో కొన్నాళ్లు నిర్వహించారు. ఇటీవల అక్కడి నుంచి కలెక్టరేట్​పార్కింగ్​ ఏరియాలోని గదికి మార్చారు. ఈ గది కూడా సరిపోవడం లేదు. దీంతో దీని ముందు భాగంలో సైతం మందులను నిల్వ ఉంచుతున్నారు.

దుమ్మే దుమ్ము..

కలెక్టరేట్‌కు​వాహనాల రద్దీ విపరీతంగా ఉంటుంది.  అధికారులే కాకుండా నిత్యం వివిధ పనులపై వచ్చేవారు ఎక్కువగా ఉండటం వల్ల పార్కింగ్​ ఏరియాలో దుమ్ము రేగుతోంది. అదే ప్రాంతంలోని గదిలో సెంట్రల్ డ్రగ్ స్టోర్ నిర్వహిస్తున్నారు.  ఈ రూంను కలెక్టరేట్ లో గతంలో స్టోర్​రూంగా వాడేవారు. ఈ స్టోర్​రూంలోనే ఇప్పుడు సెంట్రల్​డ్రగ్​స్టోర్​ నిర్వహిస్తుండగా మందుల నిల్వకు దుమ్ము బాధలు తప్పడం లేదు.  

సౌకర్యాలేవీ... 

జనగామ జిల్లాలో ఒక జిల్లా హాస్పిటల్, ఒక ఎంసీహెచ్, నాలుగు సీహెచ్​సీలు, 12 పీహెచ్​సీల ద్వారా వైద్య సేవలు అందుతున్నాయి. ఈ హాస్పిటల్స్​ అన్నింటికీ గతంలో ఉమ్మడి వరంగల్​ సీడీఎస్​ నుంచి మందుల పంపిణీ జరిగేది. ఇప్పుడు ఇక్కడే సెంట్రల్​డ్రగ్​స్టోర్ ఏర్పాటు కావడంతో ఇక్కడి నుంచే పంపిణీ చేస్తున్నారు. సర్కారు ఇండెంట్​ ప్రకారం 500 రకాలకు పైగా మందులు సీడీఎస్​లలో ఉండాలి. 300ల రకాలు నిత్యం అందుబాటులో ఉంటున్నాయని వీటిలో 130 రకాల మందులు ఎక్కువగా రన్​ అవుతున్నట్లు అధికారులు చెబుతున్నారు. 

డిమాండ్​ ఎక్కువగా ఉండే ఈ 130 రకాల మందులకు సంబంధించి కొరత లేకుండా చర్యలు తీసుకుంటున్నారు. ఇంత వరకు బాగానే ఉన్నా సిరప్​లు, ఇంజెక్షన్​ల వంటి కొన్ని డ్రగ్స్​ ను నిర్ణీత టెంపరేచర్​ ఉన్న గదిలోనే నిల్వ ఉంచాల్సి ఉంటుంది. కానీ ఈ డ్రగ్​ స్టోర్​లో ఏసీలు, ఫ్రీజర్​ వంటి సౌకర్యాలు లేక అవస్థలు తప్పడం లేదు. అందుకోసం అధికారులు పక్కా బిల్డింగ్​ నిర్మాణం త్వరితగతిన చేపట్టాలని వైద్యవర్గాలు కోరుతున్నాయి.