అలాట్మెంట్ స్టేజ్లోనే జనగామ టెక్స్టైల్ పార్క్
119 ఎకరాల విస్తీర్ణంలో ఏర్పాట్లు
560 ఇండస్ట్రీస్లో 88 మాత్రమే కేటాయింపు
నిరుద్యోగులకు తప్పని ఎదురుచూపులు
జనగామ, వెలుగు: ఉపాధి కోసం పొట్టచేతపట్టుకొని సోలాపూర్ పోయిన వలస కార్మికులకు ఇక్కడే పని చూపేందుకు జనగామలో ఏర్పాటుచేస్తున్న టెక్స్టైల్ పార్క్పనులు ఇంకా స్పీడందుకోవడం లేదు. 560 ఇండస్ట్రీస్ తో మరో సోలాపూర్ లా డెవలప్చేసి, క్లాత్తయారీ ద్వారా వేలాది మందికి ఉద్యోగాలు, ఉపాధి కల్పించే చాన్స్ ఉన్నప్పటికీ పనులు స్లోగా సాగడంపై విమర్శలు వ్యక్తమవుతున్నాయి. ఫిబ్రవరిలోనే ఈ పార్క్ కార్యరూపంలోకి వస్తుందని ఆశించినా పాలకులు, ఆఫీసర్ల నిర్లక్ష్యంతో పనులు పూర్తవలేదు. తాజాగా కరోనా తోడైంది. ప్రస్తుతం లాక్డౌన్ఆంక్షలు ఎత్తేసినందున టీఎస్ఐఐసీ ఆధ్వర్యంలో పనులు స్పీడప్ చేస్తే హైదరాబాద్ టు వరంగల్ ఇండస్ట్రీయల్ కారిడార్లో తొలి అంకం పూర్తవుతుంది. జనగామ జిల్లా కేంద్రానికి 8 కిలోమీటర్ల దూరంలో లింగాల ఘన్పూర్మండలం కళ్లెం సమీపంలో టెక్స్టైల్ పార్క్ నిర్మాణానికి గతేడాది పర్మిషన్ వచ్చింది. టీఎస్ఐఐసీ ఆధ్వర్యంలో గ్రామ శివారులోని 456 సర్వే నంబర్లో 136 ఎకరాల 12 గుంటల ప్రభుత్వ భూమిని సేకరించారు. దేవాదుల కాల్వకు కొంత భూమి పోగా 119 ఎకరాలలో 560 ఇండస్ట్రీస్ ఏర్పాటు చేయాలని భావించారు. ఇందులో ఇప్పటివరకు కేవలం 88 మంది ఎంటర్ ప్రెన్యూర్ లకు ప్లాట్ల అలాట్మెంట్ జరిగింది. మిగిలిన వారంతా ఎదురుచూస్తున్నారు.
ముచ్చటగా మూడోసారి..
జనగామకు నేషనల్హైవే, రైల్వే వంటి ట్రాన్స్పోర్ట్ఫెసిలిటీస్ఉన్నా ఇండస్ర్టీయల్గా వెనకబడింది. ఫలితంగా ఈ ప్రాంతవాసులు ఉద్యోగం, ఉపాధి కోసం రాష్ట్ర రాజధాని హైదరాబాద్ వలస వెళ్తుంటారు. ప్రస్తుతం కరోనా కారణంగా కొంత తగ్గినా మిగతా రోజుల్లో రైల్వే స్టేషన్ వలస కార్మికులతో కిటకిటలాడుతూ కనిపిస్తుంది. దీంతో జనగామలోనే ఇండస్ట్రీస్ నెలకొల్పి ఉపాధి అవకాశాలు కల్పించాలనే డిమాండ్ చాలా ఏండ్లుగా ఉంది. గత కాంగ్రెస్ప్రభుత్వ హయాంలో కళ్లెం శివారులో రూ.600 కోట్లతో కామోజీ టెక్స్ టైల్పార్క్ నిర్మాణానికి పనులు మొదలు పెట్టినా పాలకుల నిర్లక్ష్యం కారణంగా ఆచరణలోకి రాలేదు. తర్వాత రూ. 300 కోట్ల అంచనాతో ఇదే స్థలంలో సూర్యవంశీ స్పిన్నింగ్ మిల్ ఏర్పాటు జరిగినట్టే జరిగి చివరికి కార్యరూపం దాల్చలేదు. ముచ్చటగా మూడోసారి టెక్స్ టైల్ పార్క్ కోసం పనులు జరుగుతున్నాయి.
ఇంకా డీ మార్కింగ్ దగ్గరే..
పార్క్ పనులు ఆశించిన దానికన్నా స్లోగా నడుస్తున్నాయి. ఈ మధ్య కాలంలో ప్లాట్ల డీమార్కింగ్ పూర్తి చేసినట్లు ఆఫీసర్లు చెప్పారు. ఒక్కో ప్లాట్ 480 నుంచి 500 స్క్వేర్ మీటర్ల నిడివి ఉండేలా చూస్తున్నారు. ఇంటర్నల్ రోడ్ల నిర్మాణానికి రూ 12.50 కోట్లు ఇటీవలే శాంక్షన్ అయ్యాయి. ఈ నెలాఖరు వరకు పనులు స్టార్ట్ అవుతాయని ఆఫీసర్లు చెబుతున్నారు. ఇవి పూర్తి కాగానే పవర్, వాటర్ సప్లై, డ్రైనేజీల నిర్మాణం తదితర మౌలిక వసతులను కల్పించనున్నారు. కాగా, ఇప్పటి వరకు స్క్వేర్ మీటర్కు రూ.1600 చొప్పున 10 శాతం అమౌంట్ఈఎండీ చెల్లించిన 88 మంది ఎంటర్ప్రెన్యూర్లకు ప్లాట్ల అలాట్మెంట్ జరిగింది. వీరు మిగిలిన మొత్తం కూడా చెల్లించి రిజిస్ర్టేషన్ చేసుకోవాలని ఆఫీసర్లు సూచిస్తున్నారు. కరోనా కారణంగా కొత్తవారికి అలాట్మెంట్, ఇదివరకే అలాట్మెంట్అయినవారికి రిజిస్ట్రేషన్ ప్రక్రియ ఆలస్యమవుతోందని చెబుతున్నారు. ప్లాట్ల రిజిస్ట్రేషన్ పూర్తైతే సదరు ఇండస్ట్రీలకు సంబంధించిన కన్స్ట్రక్షన్లు స్టార్ట్ కానున్నాయి.
సోలాపూర్ వలస వెళ్లిన వారికి..
పెద్ద కంపెనీలకు వందలాది ఎకరాలు అప్పగిస్తే రిజల్ట్ కనిపించడం లేదనుకున్న గవర్నమెంట్ చిన్న చిన్న ఎంటర్ప్రెన్యూర్లను ప్రోత్సహించే పద్ధతిన ఇక్కడ టెక్స్టైల్పార్క్ నిర్మాణానికి చర్యలు చేపడుతోంది. తెలంగాణ ప్రాంతం నుంచి సోలాపూర్ కు వలస వెళ్లినవారిని తిరిగి రప్పించి ఉపాధి కల్పించాలన్నదే లక్ష్యమని ఆఫీసర్లు చెబుతున్నారు. అందులో భాగంగా సోలాపూర్మైగ్రేటెడ్ సొసైటీ సభ్యులకు ఇండస్ట్రీలను నెలకొల్పే అవకాశం కల్పిస్తున్నారు. సుమారు 560 మంది ఇక్కడ ఇండస్ట్రీస్ ఏర్పాటు చేయనున్నారు. గత ఫిబ్రవరిలోనే ఈ ప్రక్రియ ఊపందుకుంటుందని అంచనా వేశారు. గతేడాది చివరలో ఆర్డీడీ (రీజినల్ డిప్యూటీ డైరెక్టర్) నేతృత్వంలో ఫిజికల్ వెరిఫికేషన్కూడా కంప్లీట్చేసి డీడీ(డిప్యూటీ డైరెక్టర్)కి నివేదిక అందించారు. ఇందుకు సంబంధించిన లే అవుట్కు డీటీసీపీ అప్రూవల్ కూడా అప్పట్లోనే వచ్చేసింది.
20 వేల మందికి ఉపాధి
టెక్స్ టైల్పార్క్ పూర్తయితే ప్రత్యక్షంగా, పరోక్షంగా సుమారు 20 వేల మందికిపైగా ఉపాధి దొరకనుంది. ఇక్కడ ఏర్పాటయ్యే 560 ఇండస్ట్రీస్లో క్లాత్ తయారు చేస్తారు. ఒక్కో ఇండస్ట్రీలో 20 మంది వరకు ఉద్యోగులు ప్రత్యక్షంగా పనిచేసే చాన్స్ ఉంటుంది. పరోక్షంగా వివిధ పనుల కోసం వేలమంది అవసరమవుతారు. వీరిపై ఆధారపడి పరిసర ప్రాంతాల్లో పలు రకాల బిజినెస్లు వెలిసి మరింత మంది ఉపాధి పొందనున్నారు. దీంతో పనులు ఎప్పుడు పూర్తవుతాయా అని నిరుద్యోగులు ఎదురుచూస్తున్నారు.
For More News..
