జనగామ, వెలుగు: జనగామ చంపక్హిల్స్లోని మాతా శిశు హాస్పిటల్ మరో ఘనత సాధించింది. మంగళవారం ఒక్క రోజే 31 డెలివరీలు చేసి రికార్డు నెలకొల్పింది. వీటిలో 17 నార్మల్ కాగా 14 సిజేరియన్ డెలివరీలు ఉన్నాయి. జనగామ జిల్లాతో పాటు, పొరుగున ఉన్న యాదాద్రి, సిద్దిపేట జిల్లాల్లోని సమీప మండలాలకు చెందిన పేషెంట్లు ఈ హాస్పిటల్కు వస్తుంటారు.
నిత్యం రద్దీగా ఉండే ఇక్కడ గడిచిన 24 గంటలలో 31 డెలివరీలు చేసినట్లు హాస్పిటల్ సూపరింటెండెంట్ డాక్టర్ సుగుణాకర్ రాజు తెలిపారు. వీరిలో 12 మంది ఆడ శిశువులకు, 19 మంది మగ శిశువులకు జన్మనివ్వగా తల్లీబిడ్డలు ఆరోగ్యంగా ఉన్నారు.
ALSO READ :ఖమ్మంలో కుండపోత .. పొంగిపొర్లుతున్న వాగులు
ఇదిలా ఉంటే జూన్ లో 314 డెలివరీలు కాగా వీటిలో 134 నార్మల్, 180 సిజేరియన్ ఉన్నాయి. ప్రస్తుత నెలలో ఇప్పటివరకు 308 డెలివరీలు కాగా వీటిలో 132 నార్మల్, 176 సిజేరియన్ ఉన్నాయి. హాస్పిటల్లో అన్ని రకాల ఫెసిలిటీస్ ఉండడంతో డాక్టర్లు మెరుగైన చికిత్స అందిస్తూ వస్తున్నారు. అంతేకాకుండా జనగామకు గవర్నమెంట్ మెడికల్ కాలేజీ శాంక్షన్ కావడంతో ప్రొఫెసర్లు, అసిస్టెంట్ ప్రొఫెసర్లు డ్యూటీలో చేరారు. రికార్డు డెలివరీలు చేసిన డాక్టర్లు స్రవంతి, సౌమ్యారెడ్డి, శ్రీ సూర్య, స్టాఫ్ సంగీత, విజయారాణి, సెలెస్టీనాలను పేషెంట్ల బంధువులు, హాస్పిటల్ సూపరింటెండెంట్డాక్టర్ సుగుణాకర్ రాజు అభినందించారు.
