జపాన్లోని కనగవకు చెందిన ఆర్టిస్ట్ లిటో.. ఆకు మీద చెక్కిన చిత్రాలు అబ్బురపరుస్తాయి. ఒకప్పుడు కార్పొరేట్ జాబ్ చేశాడు. కానీ, ఏ పని చేసినా అందులో తప్పులు ఉండేవి. దాంతో ఎప్పుడూ తిట్టించుకునేవాడు. తను పనిని ఎందుకు సరిగా చేయలేకపోతున్నాడో తనకే అర్థమయ్యేది కాదట. ఆ విషయం గురించి బాగా ఆలోచించాక ఒకసారి డాక్టర్ దగ్గరకి వెళ్లాడు. అక్కడ తనకు ఏడీహెడీ (అటెన్షన్ డెఫిసిట్ హైపరాక్టివిటీ డిజార్డర్) సమస్య ఉందని తెలిసింది. దీంతో కార్పొరేట్ కంపెనీలో ఉద్యోగం మానేశాడు. అప్పటికి తన వయసు 30 ఏండ్లే. ఆ తర్వాత తన బలహీనతను బలంగా మార్చుకునే ఉద్యోగం కోసం చాలా వెతికాడు. అప్పుడే ఈ లీఫ్ ఆర్ట్ తన లైఫ్లోకి వచ్చింది.
“లీఫ్ ఆర్ట్ గురించి నాకు పెద్దగా ఏమీ తెలియదు. నా ఆలోచనలు, ఫ్యామిలీతో కలిసి బయటకు వెళ్లడం, చిన్నప్పుడు ఫ్రెండ్స్తో కలిసి ఆడుకోవడం, విన్న వాటి నుంచి ఇన్స్పైర్ అవుతాను. కొన్నిసార్లు నేను ఫ్యామిలీతో కలిసి భోజనం చేసేటప్పుడు, టీవీ చూసేటప్పుడు కూడా కొత్త ఆలోచనలు వస్తుంటాయి. నాకు చిన్నప్పటి నుంచి హయావో మియాజాకి యానిమేషన్లు ఇష్టం. మొదట్లో నా ఆర్ట్స్ అన్నీ వీడియోగేమ్, యానిమే క్యారెక్టర్స్తోపాటు అంతరించిపోతున్న జాతుల వంటి జీవులపై ఆధారపడి ఉండేవి. అయితే వాటికి సోషల్ మీడియా నుంచి అనుకున్నంతగా రెస్పాన్స్ రాలేదు.
అప్పుడు నేను థీమ్ కోసం వెతకడం మొదలుపెట్టా. దీంతో రకరకాల థీమ్లను బేస్ చేసుకుని కళాకృతులను తయారుచేయడం స్టార్ట్ చేశా. అప్పటి నుంచి సోషల్ మీడియా ద్వారా చాలా కంపెనీల నుంచి వర్క్ ఆపర్చునిటీలు వచ్చాయి. ఆ తర్వాత నా కలెక్షన్స్ అన్నింటినీ ప్రచురిస్తామని పబ్లిషర్ నుంచి ఆఫర్ వచ్చింది. సోషల్ మీడియా లేకపోతే నాకు ఈ పనిని సంపాదనగా మార్చుకోవడం సాధ్యమయ్యేది కాదు. నేను పడుకునే ముందు నా పనిని చూసుకుంటే రిలాక్స్గా అనిపిస్తుంది. పొద్దున్నే చూస్తే మళ్లీ వర్క్ స్టార్ట్ చేయాలని ప్రేరణ కలుగుతుంది.
నా పని చాలామంది జీవితాల్లో భాగమైనందుకు సంతోషంగా ఉన్నాను. ఇది ఇలాగే కొనసా గాలని ఆశిస్తున్నా. ప్రస్తుతం జపాన్ అంతటా ప్రదర్శనలిస్తున్నాను. నేను ఎక్కడికి వెళ్లినా అక్కడ నా పని గురించి తెలిసి నా కోసం వెయిట్ చేస్తున్నవాళ్లని చూసి ఆశ్చర్యమేస్తోంది. నేను నా మొదటి పిక్చర్ బుక్ ‘ఎ గ్రేట్ ఇమిటేటర్ కామెలియాన్’ అనే పేరుతో పబ్లిష్ చేశా. అది లక్షల కాపీలు అమ్ముడయింది. మనసుల్ని సంతోషంగా లేదా మానసికంగా కదిలించే పని క్రియేట్ చేయడం ఇంపార్టెంట్ అని నేను భావిస్తా. ప్రపంచవ్యాప్తంగా నా ఆర్ట్ని ప్రదర్శించాలనుకుంటున్నా”అంటున్నాడు లిటో.
