కుమ్రంభీమ్ ఆసిఫాబాద్ జిల్లా కాగజ్నగర్ అటవీ డివిజన్లోని పెంచికల్పేట్ రేంజ్ పరిధిలోని నందిగాం అడవుల్లో ప్రాణహిత, పెద్దవాగు నదులు కలిసే చోట ఉన్న పాలరాపుగుట్టపై 10 ఏండ్ల క్రితం రాబందుల జాడను మొదటిసారి గుర్తించారు. అప్పట్లో 30 వరకు రాబందులు ఉండగా, ఇటీవల కాలంలో వాటి సంఖ్య తగ్గుతుండటంతో కాగజ్నగర్ అడవుల్లో రాబందుల ఆవాసంగా ఉన్న పాలరాపు గుట్టను జటాయు సంరక్షణ కేంద్రంగా అభివృద్ధి చేయాలని తెలంగాణ రాష్ట్ర ప్రభుత్వం నిర్ణయించింది. ఏకో టూరిజం డెవలప్మెంట్ ప్రోగ్రామ్లో భాగంగా రూ.2.5కోట్లతో రాబందుల ఆవాసాన్ని ఏర్పాటు చేయనున్నారు.
జటాయు సంరక్షణ చర్యలు
- అటవీ సమీప గ్రామాల్లో రైతులు, పశువుల కాపరులకు రాబందుల గురించి అవగాహన కల్పించడం.
- పాలరాపుగుట్టల వెంట అటవీ ఉత్పత్తులు, వంట చెరకు సేకరణ నిషేధించడం.
- పాలరాపుగుట్టల వైపుగా పశువులను మేతకు తీసుకెళ్లకుండా ప్రత్యామ్నాయంగా గ్రామ శివార్లలోనే గడ్డి క్షేత్రాలను పెంచడం. అడవిలో నిప్పు రాజుకోకుండా చర్యలు చేపట్టడం. సహజ రీతిలో రాబందులకు ఆహారం అందేలా చూడటం.
