హైదరాబాద్, వెలుగు: జేఈఈ మెయిన్– 2 ఫైనల్ కీ పై అయోమయం నెలకొన్నది. గురువారం సాయంత్రం నేషనల్ టెస్టింగ్ ఏజెన్సీ (ఎన్టీఏ) ఫైనల్ కీని అధికారిక https://jeemain.nta.nic.in వెబ్సైట్ లో పెట్టింది. కొద్దిసేపటికే మళ్లీ దాన్ని డిలీట్ చేసింది. దీంతో రాత్రి వరకూ ఫలితాలు వస్తాయని ఎదురుచూసిన విద్యార్థులు, తల్లిదండ్రులకు నిరాశ ఎదురైంది.
కీని ఎందుకు మళ్లీ డిలీట్ చేశారనే దానిపై ఎన్టీఏ ఎలాంటి ప్రకటన చేయలేదు. అయితే, జేఈఈ మెయిన్ 2 రిజల్ట్ తో పాటు మెయిన్ కటాఫ్ పర్సంటైల్, టాప్ ర్యాంకర్ల డేటాను రిలీజ్ చేయాల్సి ఉంది. కాగా, ఈ నెల 2 నుంచి 9 వరకు జేఈఈ మెయిన్ –2 పరీక్షలు జరిగాయి. ఈ నెల 13 వరకు ప్రిలిమినరీ కీపై అభ్యంతరాలను స్వీకరించారు.
ఈ క్రమంలోనే గురువారం సాయంత్రం ఫైనల్ కీ రిలీజ్ చేశారు. దీంట్లో రెండు క్వశ్చన్లను డిలీట్ చేసినట్టు ప్రకటించారు. అయితే, కాసేపటికే మెయిన్ ఫైనల్ కీని వెబ్ సైట్ నుంచి డిలీట్ చేశారు.
