రెండు దశల్లో జార్ఖండ్ ఎన్నికలు: షెడ్యూల్ ఇదే

రాంచీ: జార్ఖండ్ అసెంబ్లీ ఎన్నికల నగారా మోగింది. జార్ఖండ్ అసెంబ్లీ ఎన్నికల షెడ్యూల్‎ను కేంద్ర ఎన్నికల సంఘం 2024, అక్టోబర్ 15న ప్రకటించింది. ఎన్నికల వివరాలను చీఫ్ ఎలక్షన్ కమిషనర్ రాజీవ్ కుమార్ మీడియా సమావేశంలో వెల్లడించారు. ఈసీ షెడ్యూల్ ప్రకారం.. మొత్తం రెండు దశల్లో జార్ఖండ్ అసెంబ్లీ ఎన్నికలు జరగనున్నాయి. ఫస్ట్ ఫేజ్ లో 43 అసెంబ్లీ సెగ్మెంట్లకు ఎన్నికలు జరగనుండగా.. రెండో దశలో 38 స్థానాలకు పోలింగ్ నిర్వహించనున్నారు. తొలి దశ పోలింగ్ 2024, నవంబర్ 13వ తేదీన జరగనుంది.

సెకండ్ ఫేజ్ ఎలక్షన్స్ 2024, నవంబర్ 20న జరగనున్నాయి. 2024, నవంబర్ 23న జార్ఖండ్ అసెంబ్లీ ఎన్నికల కౌంటింగ్, ఫలితాలు విడుదల కానున్నాయి. జార్ఖండ్‎లో ప్రస్తుతం జేఎంఎం, కాంగ్రెస్, ఆర్జేడీ కూటమి అధికారంలో ఉంది. ఈ కూటమిని గద్దె దించి ఎలాగైనా ఈ సారి జార్ఖండ్‎లో పాగా వేయాలని బీజేపీ ప్రయత్నాలు చేస్తోండగా.. కాషాయ పార్టీని మట్టి కరిపించి అధికారం నిలబెట్టుకోవాలని కూటమి ప్రణాళికలు రచిస్తోంది. మరి జార్ఖండ్‎లో ఏ పార్టీ, కూటమి విజయం సాధిస్తోందో తెలియాలంటే నవంబర్ 23వ తేదీ వరకు వెయిట్ చేయాల్సిందే.