- అన్న భూమిని కొట్టేసేందుకు ఫేక్ డాక్యుమెంట్ల తయారు
- వాటితో రెవెన్యూ అధికారులను మోసగించినందుకు కేసు
జోగిపేట, వెలుగు: ఫేక్ డాక్యుమెంట్లతో అధికారులను తప్పుదోవ పట్టించిన జోగిపేట మార్కెట్కమిటీ మాజీ చైర్మన్ అరెస్ట్ అయ్యాడు. శుక్రవారం జోగిపేట ఎస్ఐ పాండు తెలిపిన వివరాల మేరకు.. జోగిపేట మార్కెట్కమిటీ మాజీ చైర్మన్డీబీ నాగభూషణం సొంత అన్న బుడాల రాములుకు జోగిపేటలో సర్వేనంబర్217, 218లో రెండు ఎకరాల11 గుంటల వ్యవసాయ భూమి ఉంది. రాములు గతేడాది సెప్టెంబర్15న చనిపోయాడు. అన్న భూమిని కాజేసేందుకు నాగభూషణం ప్లాన్ చేశారు. గత ఏప్రిల్1న పట్టాపాస్ బుక్లో మార్పు కోరుతూ ధరణి పోర్టల్లో అప్లై చేశాడు.
తహసీల్దార్ ఫోన్చేసి ఒరిజినల్ పట్టా కాపీ అందజేయాలని సూచించారు. దీంతో నాగభూషణం పరిచయస్తుడైన ప్రొఫెసర్ శ్రీకాంత్ పేరిట గెజిటెడ్ సంతకం, స్టాంప్ ఫోర్జరీతో ఫేక్ డాక్యుమెంట్ తయారు చేసి తహసీల్దార్కు అందజేశాడు. దీనిపై విచారణ చేయగా ఫేక్ డాక్యుమెంట్ అని తేలాయి. దీంతో అందోల్ డిప్యూటీ తహసీల్దార్ మధుకర్ రెడ్డి ఫిర్యాదుతో కేసు నమోదు చేసి డీబీ నాగభూషణంను అరెస్టు చేసినట్లు ఎస్ఐ తెలిపారు
