నర్సాపూర్ /కౌడిపల్లి, వెలుగు : అసెంబ్లీ ఎన్నికల నేపథ్యంలో నర్సాపూర్ నియోజకవర్గంలో అనూహ్య పరిణామాలు చోటుచేసుకుంటున్నాయి. బీఆర్ఎస్ సీనియర్ లీడర్, కేంద్ర కార్మిక సంక్షేమ బోర్డు చైర్మన్గా పనిచేసిన దివంగత చిలుముల కిషన్రెడ్డి భార్య, బీఆర్ఎస్ మహిళా విభాగం ఉమ్మడి మెదక్ జిల్లా మాజీ అధ్యక్షురాలు చిలుముల సుహాసినిరెడ్డి, ఆమె కొడుకు చిలప్ చెడ్ మాజీ జడ్పీటీసీ శేషసాయిరెడ్డి గురువారం ఢిల్లీలో తెలంగాణ రాష్ట్ర కాంగ్రెస్ వ్యవహారాల ఇన్చార్జి మాణిక్ రావ్ థాక్రే, టీపీసీసీ ప్రెసిడెంట్ రేవంత్ రెడ్డి సమక్షంలో కాంగ్రెస్ లో చేరారు.
నర్సాపూర్ ఎమ్మెల్యే, బీఆర్ఎస్ ప్రజాప్రతినిధులు, నాయకుల తీరు నచ్చక శేషసాయిరెడ్డి ఏడాదిన్నర కింద జడ్పీటీసీ పదవికి, బీఆర్ఎస్ కు రాజీనామా చేశారు. రెండు రోజుల కింద మల్కాజిగిరి ఎమ్మెల్యే మైనంపల్లి హన్మంతరావు, టీపీసీసీ ఉపాధ్యక్షుడు గాలి అనిల్కుమార్, ప్రధాన కార్యదర్శి ఆవుల రాజిరెడ్డి కౌడిపల్లిలోని వారింటికి వెళ్లి కాంగ్రెస్ లోకి ఆహ్వానించారు. దీంతో తాము కాంగ్రెస్లో చేరామని శేషసాయిరెడ్డి ప్రకటించారు.
శివ్వంపేట మండలం గోమారం గ్రామానికి చెందిన బీఆర్ఎస్ మెదక్ జిల్లా విద్యార్థి విభాగం అధ్యక్షుడు సుధీర్ రెడ్డి, కౌడిపల్లి మండల బీఆర్ఎస్ యూత్ అధ్యక్షుడు చంద్రం కృష్ణ గౌడ్ కూడా పార్టీలో చేరారు. వెంట గాలి అనిల్ కుమార్ ఉన్నారు.
