ఉట్నూర్, వెలుగు : ఉమ్మడి ఆదిలాబాద్ జిల్లా వ్యాప్తంగా ఏజెన్సీ ప్రాంతాల్లో ఆదివాసీల సమస్యలు పరిష్కరించాలని తుడుం దెబ్బ ఉమ్మడి ఆదిలాబాద్ జిల్లా అధ్యక్షుడు పుర్క బాపురావు డిమాండ్ చేశారు. సోమవారం ఉట్నూర్ఐటీడీఏ ఎదుట తుడుందెబ్బ అధ్వర్యంలో ధర్నా చేశారు. ఐటీడీఏ పీవో ఖుష్బూ గుప్తాకు వినతిపత్రం ఇచ్చారు. బాపురావు మాట్లాడుతూ షెడ్యుల్డ్ ప్రాంతాల్లో నివసిస్తున్న ఆదివాసీ నిరుద్యోగుల కోసం మెగా డీఎస్సీ నిర్వహించాలని, ఐటీడీఏలోని బ్యాక్లాగ్ పోస్టులను భర్తీ చేయాలన్నారు. పోడు భూములు సాగు చేసుకుంటున్న ఆదివాసీ రైతులకు హక్కు పత్రాలివ్వాలని డిమాండ్ చేశారు.
లంబాడీలను ఎస్టీ జాబితా నుంచి తొలగించి ఆదివాసీలకు న్యాయం చేయాలని కోరారు. జీవో నంబర్ 3ను యథావిధిగా కొనసాగించడంతో పాటు జీవో నంబర్3 ప్రకారం ఉద్యోగులను బదిలీ చేసి, పదోన్నతులు ఇవ్వాలన్నారు. 29 ప్రభుత్వ శాఖల్లో జీవోలను చట్టాలుగా రూపొందించి అమలు చేయాలన్నారు. ఏజెన్సీలో 1/70 చట్టం, పెసా, అటవీ హక్కుల చట్టాలను పూర్తిస్థాయిలో అమలు చేయాలన్నారు.
5వ షెడ్యుల్డ్ప్రాంతంలో జీవో నంబర్317ను రద్దు చేయాలన్నారు తుడుం దెబ్బ రాష్ట్ర గౌరవ అధ్యక్షుడు బుర్సా పోషయ్య, వర్కింగ్ అధ్యక్షుడు గెడం నగేశ్, జిల్లా ప్రధాన కార్యదర్శి వెట్టి మనోజ్, లీడర్లు సోయం జంగు, కుడ్మెత తిరుపతి, కొడప నాగేశ్, నైతం రమేశ్, దాదెరావ్ ఉన్నారు.
