ఇరిగేషన్ మంత్రిని కోరిన ఉమ్మడి పాలమూరు జిల్లా ఎమ్మెల్యేలు
పాలమూరు/మక్తల్, వెలుగు: కొడంగల్, నారాయణపేట, మక్తల్ నియోజకవర్గాలకు సాగునీటిని అందించేందుకు ఉమ్మడి ఏపీలో జారీ చేసిన జీవో 69ని పునరుద్ధరించాలని మహబూబ్నగర్, నారాయణపేట, మక్తల్, దేవకరద్ర ఎమ్మెల్యేలు యెన్నం శ్రీనివాస్రెడ్డి, పర్ణికారెడ్డి, వాకిటి శ్రీహరి, జి.మధుసూదన్రెడ్డి, సీడబ్ల్యూసీ ప్రత్యేక ఆహ్వానితుడు చల్లా వంశీచంద్ రెడ్డి సోమవారం ఇరిగేషన్ మంత్రి ఉత్తమ్కుమార్ రెడ్డిని కలిసి వినతిపత్రం అందజేశారు.
ఈ జీవో ద్వారా నారాయణపేట–-కొడంగల్ స్కీంను చేపట్టి ఈ ప్రాంతాన్ని సస్యశ్యామలం చేయాలని కోరారు. 2014లోనే ఈ స్కీముకు అనుమతులు వచ్చినా, గత బీఆర్ఎస్ ప్రభుత్వం నిర్లక్ష్యం చేసిందనే విషయాన్ని మంత్రి దృష్టికి తీసుకెళ్లారు. దీనిపై సానుకూలంగా స్పందించిన మంత్రి ఈ స్కీం ఏర్పాటుపై చర్చిస్తామని తెలిపారు. అనంతరం ఇన్చార్జి మంత్రి దామోదర రాజనర్సింహను కలిసి పలు సమస్యలను ఆయన దృష్టికి తీసుకెళ్లారు.
