- ఆయనపై హత్యాయత్నం కేసు పెట్టాలి
- జర్నలిస్టులపై దాడి దారుణం.. మండిపడ్డ జర్నలిస్టు సంఘాలు
- ఫిల్మ్ చాంబర్, రాచకొండ సీపీ ఆఫీసు ముందు నిరసన
జూబ్లీహిల్స్/ ఉప్పల్/సికింద్రాబాద్/ఓయూ, వెలుగు: జర్నలిస్టులపై సినీ నటుడు మోహన్బాబు దాడి చేయడాన్ని జర్నలిస్టు సంఘాలు తీవ్రంగా ఖండించాయి. ఆయనపై హత్యాయత్నం కేసు నమోదు చేసి, అరెస్ట్ చేయాలని డిమాండ్ చేశారు. బుధవారం ఫిల్మ్ చాంబర్ ఎదుట జర్నలిస్టు సంఘాల నేతలు ఆందోళన చేపట్టారు. ఇందులో పాల్గొన్న సీనియర్ జర్నలిస్టు దేవులపల్లి అమర్ మాట్లాడుతూ.. జర్నలిస్టుల రక్షణకోసం ప్రత్యేక చట్టం తేవాలన్నారు.
దీనికోసం ఎప్పటి నుంచో పోరాటం చేస్తున్నామని తెలిపారు. జర్నలిస్టులపై మోహన్బాబు దాడి చేయడం దారుణమన్నారు. ప్రభుత్వ విధుల్లో ఉన్న అధికారులపై ఎవరైనా దాడి చేస్తే ఏ చర్యలు తీసుకుంటారో.. జర్నలిస్టులపై దాడులు చేసిన వారిపైనా అటువంటి చర్యలే తీసుకునేలా చట్టాలు చేయాలని డిమాండ్ చేశారు. ‘‘ప్రతి ఇంటిలోనూ సమస్యలు వస్తాయి. అయితే సెలబ్రిటీలుగా ఉన్నవారు ఘర్షణలతో రోడ్డుపైకి వస్తే మీడియా తన పాత్ర పోషిస్తుంది.
రోడ్డుపైకి వస్తే మీడియా రోల్ఉంటుంది”అని ఆయన అన్నారు. మోహన్బాబును వెంటనే అరెస్ట్ చేసి, హత్యాయత్నం కేసు నమోదు చేయాలని మీడియాఅకాడమీ మాజీ చైర్మన్ అల్లం నారాయణ డిమాండ్చేశారు. దాడి జరిగి 24 గంటలు గడుస్తున్నా మోహన్బాబు కనీసం క్షమాపణ చెప్పలేదన్నారు. మోహన్బాబు కుటుంబాన్ని మా అసోసియేషన్ నుంచి తొలగించాలని జర్నలిస్టులు మారుతీ సాగర్, సూరజ్, ఎన్.మల్లేష్ బాబు, ఫిలిం జర్నలిస్టు యూనియన్ నేత లక్ష్మీనారాయణ డిమాండ్ చేశారు. కాగా.. మల్కాజిగిరి ప్రెస్క్లబ్ ఆధ్వర్యంలో జర్నలిస్టులు రాచకొండ సీపీ ఆఫీసు ఎదుట నిరసన తెలిపారు. మోహన్బాబుపై కేసు నమోదు చేయాలని, దాడులు పునరావృతం కాకుండా రాష్ట్ర ప్రభుత్వం, పోలీసు శాఖ చర్యలు తీసుకోవాలని డిమాండ్చేశారు. ఉప్పల్ రింగ్ రోడ్డు వద్ద కూడా జర్నలిస్టులు నిరసన వ్యక్తం చేశారు.
అయ్యప్ప స్వాముల నిరసన
ఇబ్రహీంపట్నం/జీడిమెట్ల: అయ్యప్ప మాలలో ఉన్న వ్యక్తులపై మోహన్బాబు దాడి చేయడం ఏమిటని అయ్యప్పస్వాములు మండిపడ్డారు. రంగారెడ్డి జిల్లా ఇబ్రహీంపట్నంలోని అయ్యప్పస్వామి దేవాలయం వద్ద సాగర్ రహదారిపై ధర్నా చేపట్టారు. స్వాములపై దాడి చేసిన మోహన్బాబును వెంటనే అరెస్టు చేయాలని డిమాండ్చేశారు.
కుత్బుల్లాపూర్ చెందిన అయ్యప్పస్వామి భక్తులు పేట్బషీరాబాద్ పోలీసులకు మోహన్బాబుపై ఫిర్యాదు చేశారు. వెంటనే చర్యలు తీసుకోవాలని డిమాండ్ చేశారు. ఫిర్యాదు చేసినవారిలో సూదుల సంపత్గౌడ్, సమ్మయ్య, చక్రధర్, రాధా కృష్ణమూర్తి, వంశీధర్, అనీల్, కరుణాకర్రెడ్డి ఉన్నారు.
