తనపై అభిమానులు చూపిస్తున్న అపారమైన ప్రేమ, గౌరవానికి జూనియర్ ఎన్టీఆర్ హృదయపూర్వకంగా కృతజ్ఞతలు తెలియజేస్తున్నారు. అలాగే తనను కలుసుకోవాలని ఎదురు చూస్తున్న అభిమానుల ఆసక్తిని అర్థం చేసుకుని, త్వరలో ఒక సజావుగా ఏర్పాటు చేసిన సమావేశంలో వ్యక్తిగతంగా వారిని కలుసుకోవాలని నిర్ణయించుకున్నారు.
ఈ కార్యక్రమాన్ని అన్ని అనుమతులు పొందుతూ, పోలీస్ డిపార్ట్‌మెంట్ మరియు సంబంధిత అధికారులతో సమన్వయం చేసుకుని శాంతి భద్రతల సమస్యలు రాకుండా జాగ్రత్తలు తీసుకుంటున్నారు. ఇంత పెద్ద సమావేశం నిర్వహించటానికి కొంత సమయం అవసరం అవుతుంది కాబట్టి, అభిమానులు ఓర్పుగా ఉండాలని కోరుతున్నారు.
ఈ నేపథ్యంలో, అభిమానులు తనను కలుసుకోవడానికి పాదయాత్ర వంటివి చేయరాదని జూనియర్ ఎన్టీఆర్ విజ్ఞప్తి చేస్తున్నారు. తన అభిమానుల ఆనందమే కాదు, వారి సంక్షేమం కూడా తనకు అత్యంత ప్రధానం అని ఆయన మరోసారి స్పష్టం చేస్తున్నారు.
ఈ విషయం ఇలా ఉండగా గత ఏడాది ఎన్టీఆర్ తెలుగులో కొరటాల శివ దర్శకత్వం వహించిన దేవర సినిమాతో బ్లాక్ బస్టర్ హిట్ అందుకున్నాడు. ఈ సినిమా దాదాపుగా రూ.670 కోట్లు (గ్రాస్) పైగా కలెక్ట్ చేసింది. అయితే దేవర రిలీజ్ సమయంలో అనుకోని కారణాలవల్ల ప్రీ రిలీజ్ ఈవెంట్ క్యాన్సిల్ అయ్యింది. ఆ తర్వాత సక్సెస్ మీట్ నిర్వహిస్తారని ఫ్యాన్స్ ఎదురు చూశారు. కానీ ఇది కుదరలేదు. దీంతో ఎన్టీఆర్ ఫ్యాన్స్ తీవ్ర నిరాశలో ఉన్నారు. ఈ కారణంగానే ఎన్టీఆర్ తన ఫ్యాన్స్ ని మీట్ అయ్యేందుకు ఫ్యాన్ మీట్ ని ప్లాన్ చేస్తున్నట్లు తెలుస్తోంది. ఈ విషయం తెలుసుకున్న తారక్ ఫ్యాన్స్ ఆనందం వ్యక్తం చేస్తున్నారు.
