కమిషన్​ను తప్పుదోవ పట్టిస్తే కఠిన చర్యలు...ఇంజనీర్లపై కాళేశ్వరం జ్యుడీషియల్​ కమిషన్​ ఆగ్రహం

• కావాలనే సమాచారం దాస్తున్నారా? అంటూ ప్రశ్న
• అఫిడవిట్​లో ఉన్న డెడికేషన్​ చేతల్లో కనిపించడం లేదంటూ ఫైర్
• చేసిన పని కూడా గుర్తుండకపోతే ఎలా అంటూ నిలదీత

హైదరాబాద్, వెలుగు: కాళేశ్వరం ప్రాజెక్టు ఇంజనీర్లపై జ్యుడీషియల్​ కమిషన్​ ఆగ్రహం వ్యక్తం చేసింది. అడిగిన వాటికి సరైన సమాధానాలు చెప్పడం లేదని.. కావాలని సమాచారం దాస్తున్నారని.. కమిషన్​ను తప్పుదోవ పట్టిస్తున్నారని మండిపడింది. కమిషన్​ను తప్పుదోవపట్టించే ప్రయత్నం చేస్తే కఠిన చర్యలు తీసుకోవాల్సి వస్తుందని హెచ్చరించింది. అఫిడవిట్​లో డెడికేటెడ్​గా పనిచేస్తున్నామని చెబుతున్నారని, ఆ డెడికేషన్​ చేతల్లో కనిపించడం లేదని పేర్కొంది.

చేసిన పని కూడా గుర్తులేకపోతే ఎలా అని ఆగ్రహం వ్యక్తం చేసింది. ఓపెన్ కోర్ట్​ క్రాస్​ ఎగ్జామినేషన్​లో భాగంగా ఇంజనీర్లను విచారిస్తున్న జ్యుడీషియల్​ కమిషన్​ చైర్మన్​ జస్టిస్​ పినాకి చంద్రఘోష్​.. బుధవారం మరో 15 మంది ఇంజనీరింగ్​ అధికారులను విచారించారు. డిజైన్​ఫ్లడ్​ గురించి హైడ్రాలజీ సీఈ జి.శంకర్​నాయక్​ను జస్టిస్​ ఘోష్​ ప్రశ్నించగా.. సమాధానం చెప్పలేక తటపటాయించారు.

డిజైన్​ ఫ్లడ్​పై స్టడీ చేశారా అని కమిషన్​ ప్రశ్నించగా.. చేశామని ఓసారి, సెంట్రల్​ వాటర్​ కమిషన్ (సీడబ్ల్యూసీ), వ్యాప్కోస్​ చేసిన స్టడీలనే తాము ప్రపోజ్​ చేశామని మరోసారి బదులిచ్చారు. 2016 జనవరి 17న అప్పటి సీఎం ముందు నిర్వహించిన మీటింగ్​లో వ్యాప్కోస్​ డీపీఆర్​ను సమర్పించింది కదా అని కమిషన్​ ప్రశ్నిస్తే.. తాను ఆ మీటింగ్​లో లేనని చెప్పారు. కాళేశ్వరం ప్రాజెక్టు వరద, డిశ్చార్జ్​ ఫ్లడ్​కు సంబంధించి సీడబ్ల్యూసీనే క్లియరెన్స్​ ఇచ్చిందని పేర్కొన్నారు. 

నీటి లభ్యత స్టడీస్​ చేయాలని సూచించినం

మేడిగడ్డ, అన్నారం, సుందిళ్ల బ్యారేజీలు నిర్మించే ప్రదేశాల్లో నీటి లభ్యతపై అధ్యయనం చేయాలని  కాళేశ్వరం ప్రాజెక్టు అధికారులకు సూచించామని జి. శంకర్​ నాయక్​ తెలిపారు. వందేండ్ల సగటు వరద లేదా ఐఎస్​ కోడ్​ 5,477 నిర్దేశించిన వరద ప్రమాణాల్లో ఏది ఎక్కువుంటే దాని మేరకు స్టడీస్​ చేయాలని సూచించామన్నారు. క్రాస్​ సెక్షన్లుండడం, వాగులు వంకలు కలుస్తుండడంతో ఆయా ప్రదేశాల్లో వరద డిశ్చార్జ్​పైనా అధ్యయనం చేయాలని సూచించామన్నారు.

అన్నారం, సుందిళ్ల బ్యారేజీల వద్ద నీటి లభ్యత, డిశ్చార్జ్​ ఫ్లడ్​పై మరోసారి స్టడీ చేయాల్సిందిగా అధికారులతో చెప్పానన్నారు. బ్యారేజీల లొకేషన్లను మార్చడంతో రీఎగ్జామిన్​ చేయాల్సిన అవసరం ఉందని చెప్పానన్నారు. దానికి సంబంధించి మూడు లెటర్లు రాశామని వివరించారు. అన్నారం, సుందిళ్ల బ్యారేజీల వద్ద ఉన్న నీటి లభ్యత కలిపి మేడిగడ్డ వద్ద అందుబాటులో ఉంటుందని పేర్కొన్నారు. వాస్తవానికి నీటి లభ్యత స్టడీస్​ జరిగి ఆ రిపోర్ట్​ వచ్చాకే బ్యారేజీల నిర్మాణం చేపట్టాల్సి ఉంటుందని.. కానీ, ఈ బ్యారేజీల విషయంలో ఆ స్టడీ రిపోర్ట్​ రాకుండానే నిర్మాణం మొదలు పెట్టారని ఆయన కమిషన్​కు వివరించారు.

బ్యారేజీల జనరల్ అలైన్​మెంట్(జీఏ)​ డ్రాయింగ్స్​ను కూడా ఆ స్టడీస్​ పూర్తయ్యాకే చేయాల్సి ఉంటుందని చెప్పారు. అయితే, పలు విషయాల్లో ఆయన సరైన సమాధానం చెప్పకపోవడంతో జస్టిస్​ ఘోష్​ ఆగ్రహం వ్యక్తం చేశారు. తెలిసి చెప్పడం లేదా? అసలు తెలియదా? అని ప్రశ్నించారు. ఇప్పటికీ సర్వీస్​లోనే ఉన్నారు కదా.. కనీసం చేసిన పనులు కూడా గుర్తుండవా అని నిలదీశారు. 

ఎక్కడ మీ డెడికేషన్​? 

అన్నారం ఏఈఈగా పనిచేస్తున్న ఓ అధికారి తాను డెడికేటెడ్​గా పనిచేస్తున్నానని అఫిడవిట్​లో పేర్కొన్నారు. అయితే, కమిషన్​ అడిగిన ప్రశ్నలకు మాత్రం తనకేమీ తెలియదన్నట్టుగా వ్యవహరించారు. అన్నారం బ్యారేజీలో సీసీ బ్లాకులు కొట్టుకుపోయినప్పుడు అధికారులకు సమాచారమిచ్చారా అని ప్రశ్నించగా.. ఇచ్చానన్నారు. పై అధికారులకు లెటర్​ రాశారా అని ప్రశ్నించగా.. లెటర్లేమీ రాయలేదని, ఓరల్​గానే చెప్పామని బదులిచ్చారు.

దీనిపై అసంతృప్తి వ్యక్తం చేసిన జస్టిస్​ ఘోష్​.. ఇదేనా మీ డెడికేషన్​ అంటూ ఆ అధికారిని ప్రశ్నించారు. నిజంగా డెడికేషన్​ ఉండి ఉంటే పై అధికారులకు లేఖ ద్వారా సమాచారమిచ్చేవారు కదా అని ప్రశ్నించారు. కాగా, ఇప్పటి వరకు 90 మంది ఇంజనీరింగ్​ అధికారులను ఓపెన్​ కోర్టులో కమిషన్​ క్రాస్​ ఎగ్జామినేషన్​ చేసింది. మూడు రోజుల పాటు వారు చెప్పిన అంశాల ఆధారంగా ప్రాథమికంగా ఓ నోట్​ను తయారు చేయనుంది. మళ్లీ సోమవారం నుంచి క్రాస్​ ఎగ్జామినేషన్​ను పునఃప్రారంభించనుంది.