హైదరాబాద్, వెలుగు: వనపర్తి జిల్లా లక్ష్మీపల్లిలో జరిగిన శ్రీధర్ రెడ్డి హత్యతో తనకు ఎలాంటి సంబంధం లేదని మంత్రి జూపల్లి కృష్ణారావు తెలిపారు. ఈ ఘటనలో పూర్తి వివరాలు తెలుసుకోకుండానే తన హస్తం ఉందని కేటీఆర్ ఆరోపించడాన్ని ఖండించారు.
శుక్రవారం గాంధీ భవన్లో కాంగ్రెస్ సీనియర్ నేత మల్లు రవితో కలిసి మీడియాతో జూపల్లి మాట్లాడారు. ‘‘శ్రీధర్ రెడ్డికి రాజకీయాలకు సంబంధం లేదు. అక్కడి మాజీ ఎమ్మెల్యేకు ఆయన చుట్టం. ఆ ప్రాంతంలో శ్రీధర్ రెడ్డి వల్ల చాలా కుటుంబాలు ఇబ్బంది పడ్డాయి. ఆయన కుటుంబంలో ఆస్తి తగాదాలు ఉన్నాయి. ఈ హత్య ఘటనపై పూర్తి విచారణ చేయిస్తాం” అని పేర్కొన్నారు. ఈ అంశాలపై అవగాహన లేకుండా కేటీఆర్, ఆర్ఎస్ ప్రవీణ్ కుమార్ తనపై ఆరోపణలు చేయడంపై ఆయన మండిపడ్డారు. ఇంకోసారి తప్పుడు ఆరోపణలు చేస్తే పరువు నష్టం దావా వేస్తానని హెచ్చరించారు.
