- 11 రోజులు కొనసాగనున్న ఎంక్వైరీ
హైదరాబాద్, వెలుగు: కాళేశ్వరం జ్యుడీషియల్ కమిషన్ చైర్మన్ జస్టిస్ పినాకి చంద్ర ఘోష్ శుక్రవారం మరోసారి రాష్ట్రానికి రానున్నారు. ప్రాజెక్టులో జరిగిన అవినీతి, అవకతవకలపై ఇప్పటికే రెండు దఫాలుగా విచారణ జరిపిన జస్టిస్ ఘోష్.. ఈసారి విచారణలో భాగంగా ఆయన 11 రోజుల పాటు ఇక్కడే ఉండనున్నట్టు అధికార వర్గాలు చెప్తున్నాయి. ఈ దఫా అఫిడవిట్లు సమర్పించిన వారిని బహిరంగంగా ఎంక్వైరీ చేయనున్నారు.
ఇరిగేషన్ డిపార్ట్మెంట్లోని అన్ని విభాగాల నుంచి అఫిడవిట్లను కమిషన్కు ఇప్పటికే సమర్పించారు. కానీ, ఈ నెల 7 నాటికి ఎన్డీఎస్ఏ రిపోర్ట్ను అందించాలని కోరినా.. ఆ నివేదిక తయారీకి టైం పట్టే అవకాశాలు కన్పిస్తున్నాయి. జియో టెక్నికల్ ఇన్వెస్టిగేషన్స్ చేస్తున్న సమయంలో ఇబ్బందులు వస్తుండడంతో అక్కడ ఆ టెస్టులను అధికారులు ఆపేశారు. ఈ క్రమంలోనే ప్రత్యామ్నాయాలను సూచించాలని ఇరిగేషన్ అధికారులు ఎన్డీఎస్ఏకి లేఖ రాశారు. దానికి అనుగుణంగా ఎన్డీఎస్ఏ చేసే సిఫార్సులకు అనుగుణంగా అక్కడ టెస్టులు చేయాల్సి ఉంటుందని అధికారులు చెప్తున్నారు. దీంతో కమిషన్ గడువును పొడిగించే అవకాశాలు ఉన్నట్టు చర్చ జరుగుతోంది.
