స్టేషన్ఘన్పూర్, వెలుగు: ప్రజాపాలన దరఖాస్తుల రూపకల్పనలో లోపాలు ఉన్నాయని ఎమ్మెల్యే కడియం శ్రీహరి ఆరోపించారు. స్టేషన్ఘన్పూర్లో మంగళవారం ఆయన మీడియాతో మాట్లాడారు. దరఖాస్తుల్లో వివరాలు సమగ్రంగా లేవన్నారు. రైతు భరోసా కాలమ్ కింద రైతు, కౌలు రైతు ఆప్షన్ ఇచ్చారని, కౌలు కోసం అగ్రిమెంట్ ఎవరూ చేసుకోరని, కేవలం నోటిమాట ద్వారా వ్యవసాయ భూములను కౌలుకు తీసుకుని సాగు చేస్తారన్నారు. రైతుకు, కౌలు రైతుకు మధ్య అగ్రిమెంట్ లేనపుడు కాంగ్రెస్ ప్రభుత్వం కౌలు రైతులకు ఏ విధంగా ఆర్థిక సహాయం చేస్తుందన్నారు.
మేడారం సమ్మక్క జాతరకు ఆర్టీసీ బస్సుల్లో ఫ్రీ ప్రయాణం లేదని ఆఫీసర్లు ప్రకటించడం బాధకరమన్నారు. 100 రోజుల్లో 6 గ్యారంటీలు అమలు చేస్తామని కాంగ్రెస్ పాలకులు చెబుతున్న మాటలు సత్యదూరమేనని ఎద్దేవాచేశారు. అంతకుముందు స్టేషన్ఘన్పూర్ మండలంలోని చాగల్లులో ప్రజాపాలన కార్యక్రమాన్ని ప్రారంభించారు. లబ్ధిదారులకు కల్యాణలక్ష్మి చెక్కులను పంపిణీ చేశారు. ఈ కార్యక్రమంలో చాగల్లులో ఆర్డీవో వాసం రామ్మూర్తి, డీజీహెచ్ఎస్ డా సుగుణాకర్రాజు, పంచాయతీరాజ్ ఈఈ చంద్రశేఖర్రావు, సర్పంచుల ఫోరం మండల అధ్యక్షుడు పోగుల సారంగపాణి, తహసీల్దార్ వెంకటేశ్వర్లు పాల్గొన్నారు.
