- మండిపడుతున్న రైతులు
కాగజ్ నగర్, వెలుగు: అడవులను రక్షించేందుకు పోడు రైతులు, ప్రజలు సహకరించాలని కాగజ్ నగర్ ఇన్చార్జి రేంజ్ ఆఫీసర్ శశిధర్ బాబు కోరారు. ఫారెస్ట్ భూముల ఆక్రమణ, పంటల సాగు చేస్తే కఠిన చర్యలు తీసుకుంటామని హెచ్చరించారు. కాగజ్ నగర్ రేంజ్ రాస్పల్లి సెక్షన్ కడంబ బీట్లోని కంపార్ట్మెంట్ 129లో కొందరు రైతులు అక్రమంగా సాగు చేస్తున్న పంటలను సిబ్బందితో కలిసి తొలగించారు.
గతంలో ఈ ప్రాంతంలో మొక్కలు నాటగా అందులో కంది పంట వేశారని వాటిని తొలగించినట్లు చెప్పారు. అయితే తమకు పట్టాలున్నాయని, ఏండ్లుగా సాగుచేస్తున్న భూములను అధికారులు ఫారెస్ట్ భూములను లాక్కుంటున్నారని రైతులు మండిపడుతున్నారు. 2 నెలల క్రితం వేసిన పంటను ఇప్పుడు తొలగించి నష్టం చేశారని ఆవేదన వ్యక్తం చేశారు. ఐదుగురు రైతులకు చెందిన సుమారు 6 ఎకరాల్లో సాగు చేసిన పంటను తొలగించారు.
