వరల్డ్ కప్ లో భాగంగా సోమవారం (జూన్ 24) దక్షిణాఫ్రికా, వెస్టిండీస్ మధ్య జరిగిన మ్యాచ్ లో ఒక ప్రమాదకర సంఘటన జరిగింది. ఇద్దరు సౌతాఫ్రికా ఆటగాళ్లు తృటిలో పెద్ద ప్రమాదం నుంచి బయటపడ్డారు. మ్యాచ్ లో భాగంగా ఇన్నింగ్స్ 8 ఓవర్లో ఈ సంఘటన జరిగింది. సౌతాఫ్రికా కెప్టెన్ మార్కరం బౌలింగ్ లో వెస్టిండీస్ ఓపెనర్ కైల్ మేయర్స్ భారీ షాట్ కు ప్రయత్నించాడు. స్ట్రయిట్ గా కొట్టిన ఈ బంతిని క్యాచ్ అందుకునేందుకు లాంగాన్, లాంగాఫ్ లో ఫీల్డింగ్ చేస్తున్న రబడా, జాన్సెన్ వేగంగా వచ్చారు. ఇద్దరు ఒకరికొకరు చూసుకోకుండా బంతిని అందుకోవాలని ప్రయత్నించారు.
ఈ దశలో ఒకరినొకరు ఢీ కొన్నారు. అయితే రెప్పపాటులో ఇద్దరూ జాగ్రత్త పడడంతో పెద్దగా గాయాలు కాలేదు. జాన్సెన్ బౌండరీ అవతల పడి కాస్త ఇబ్బందిగా కనిపించాడు. రబడా గ్రౌండ్ లో అలసటగా కనిపించాడు. ఈ మ్యాచ్ లో ఇద్దరూ 17 ఓవర్ వరకు బౌలింగ్ కు రాకపోవడంతో ఈ ఇద్దరి పేసర్లకు గాయాలపాలయ్యారేమో అనుకున్నారు. అయితే 18 ఓవర్లో బౌలింగ్ వేయడానికి రబడా వచ్చాడు. మార్కో జాన్సెన్ బ్యాటింగ్ చేయడానికి రావడంతో వీళ్లిద్దరికీ ఎలాంటి గాయాలు కాలేదని స్పష్టం అయింది. చివర్లో ఈ ఇద్దరే దక్షిణాఫ్రికాకు విజయాన్ని అందించారు.
ఈ మ్యాచ్ విషయానికి వస్తే తొలుత బ్యాటింగ్ చేసిన విండీస్ జట్టు నిర్ణీత 20 ఓవర్లలో 8 వికెట్లు కోల్పోయి కేవలం135 పరుగులు మాత్రమే చేసింది. విండీస్ బ్యాట్స్ మెన్లలో ఓపెనర్ కైల్ మేయర్స్(35), రోస్టన్ చేజ్‌(52)లు మాత్రమే రాణించారు. ఆ తర్వాత వర్షం కారణంగా డీఎల్ఎస్ పద్ధతిలో 17 ఓవర్లలో 123 పరుగుల లక్ష్యంతో బరిలోకి దిగిన సఫారీ జట్టు.. 16.1ఓవర్లలోనే ఛేదించింది. దీంతో 6 పాయింట్లతో సౌతాఫ్రికా సెమీస్‌కు చేరింది. ఈ గ్రూప్ లో సెమీస్ కు చేరిన మరో జట్టుగా ఇంగ్లాండ్ నిలిచింది.
