పీహెచ్​డీ అడ్మిషన్లపై అట్టుడుకుతున్న కేయూ

• అక్రమాలు తేల్చే వరకు ఉద్యమిస్తామంటున్న విద్యార్థి సంఘాలు
• మెరిట్​ లిస్ట్ ప్రకటించి చేతులు దులుపుకున్న వర్సిటీ ఆఫీసర్లు
• ఓవరాల్ మార్క్స్ రిలీజ్ చేయకపోవడంపై అనుమానాలు
• సబ్ ​కమిటీ వేసి విచారణ జరిపించాలని స్టూడెంట్ల డిమాండ్
• ఇంటర్వ్యూ కమిటీల్లోనూ రూల్స్​పట్టించుకోలేదని ఆరోపణలు ​

హనుమకొండ, వెలుగు: స్టూడెంట్ల ఆందోళనలతో హనుమకొండ జిల్లా కేంద్రంలోని కాకతీయ యూనివర్సిటీ ఐదు రోజులుగా అట్టుడుకుతోంది. పీహెచ్​డీ కేటగిరీ-–2 అడ్మిషన్లలో అవకతవకలు జరిగాయంటూ విద్యార్థి సంఘాల నాయకులు ధర్నాకు దిగగా, పోలీసులు వారిపై దాడి చేయడంతో వర్సిటీలో వాతావరణం ఒక్కసారిగా వేడెక్కింది. ఇదే టైంలో వర్సిటీ ఆఫీసర్లు హాల్​టికెట్ నంబర్లతో కూడిన మెరిట్ లిస్ట్ ను వెబ్​సైట్​లో పెట్టి చేతులు దులుపుకోవడంపై స్టూడెంట్లు మండిపడుతున్నారు. టాలెంట్​ఉన్న, ఎలిజిబుల్ స్టూడెంట్లకు కాకుండా ఇతరులకు సీట్లు కేటాయించారని ఆరోపిస్తున్నారు. ఇంటర్వ్యూ కమిటీల్లోనూ రూల్స్ పాటించలేదని ఆరోపిస్తున్నారు. అక్రమాలు తేలేవరకు ఆందోళనలు కొనసాగిస్తామని విద్యార్థి సంఘాల నేతలు స్పష్టం చేస్తున్నారు. ఈ నెల12న ఉమ్మడి వరంగల్ జిల్లా బంద్​కు పిలుపునిచ్చారు. 

వీసీ టార్గెట్​ చేశారనే ఆరోపణలు 

కేయూ పరిధిలో 2017లో పీహెచ్​డీ నోటిఫికేషన్ రిలీజ్ కాగా.. విద్యార్థుల ఆందోళనలతో దాదాపు ఆరేండ్ల తర్వాత గతేడాది మళ్లీ అడ్మిషన్లకు షెడ్యూల్​ప్రకటించారు. వర్సిటీలో దాదాపు 28 సబ్జెక్టుల్లో 212 వరకు ఖాళీలు ఉండగా.. ఇందులో 50 శాతం సీట్లు యూజీసీ నెట్, జేఆర్ఎఫ్, గేట్, ఎంఫిల్​తదితర అర్హత కలిగిన వారికి కేటగిరీ–1​కింద, ఎంట్రన్స్​టెస్ట్, ఇంటర్వ్యూ ఆధారంగా కేటగిరీ-–2 సీట్లు ఫిలప్ చేయాల్సి ఉంటుంది. గతేడాది మే నెలలో కేటగిరీ–1 అడ్మిషన్లకు నోటిఫికేషన్ ఇచ్చారు. అదే సమయంలో పార్ట్ టైం అభ్యర్థులకు సీట్లు కేటాయించేందుకు రూల్స్ బ్రేక్​చేశారనే ఆరోపణలు వచ్చాయి. ఇప్పుడు కేటగిరీ–-2 కింద మరో 50 శాతం సీట్లను నింపేందుకు ఈ ఏడాది మార్చి 21న నోటిఫికేషన్​ఇచ్చి,  ఇంటర్వ్యూల ప్రక్రియ అనంతరం ఆగస్టు 29న రిజల్ట్స్​ప్రకటించారు. ఎంట్రన్స్ టెస్ట్ మార్కులు ప్రకటించిన ఆఫీసర్లు ఇంటర్వ్యూల్లో అవకతవకలకు పాల్పడ్డారనే ఆరోపణలు వెల్లువెత్తాయి. వాస్తవానికి అడ్మిషన్​ కమిటీలో డీన్​ఆఫ్​ ఫ్యాకల్టీ, హెడ్​ఆఫ్​ది డిపార్ట్​మెంట్, బోర్డ్​ఆఫ్​ స్టడీస్​ చైర్మన్, రీసెర్చ్​ సూపర్​వైజర్, ఇతర వర్సిటీకి చెందిన ఒక ఎక్స్​టర్నల్ సబ్జెక్ట్​ఎక్స్​పర్ట్ సభ్యులుగా ఉండాలి. కానీ ఇక్కడ నిబంధనలు పాటించలేదనే ఆరోపణలు ఉన్నాయి. అడ్మిషన్​ కమిటీలో సంబంధిత డిపార్ట్​మెంట్​ సూపర్​ వైజర్లకు బదులు, ఇతర డిపార్ట్​మెంట్ల ప్రొఫెసర్లను నియమించినట్లు తెలుస్తోంది. ప్రధానంగా కంప్యూటర్​ సైన్స్​డిపార్ట్​మెంట్​లో ఇదే సమస్య తలెత్తినట్లు సమాచారం. ఎక్స్​టర్నల్ ఎక్స్​పర్ట్​ఒక్కొక్కరిని నియమించాల్సి ఉండగా.. కొన్నిచోట్ల వీసీ ఇద్దరిని నియమించారని, ఆయన కనుసన్నల్లోనే కొందరు స్టూడెంట్లను టార్గెట్ చేసి మార్కులు తగ్గించారని విద్యార్థి సంఘాల నేతలు ఆరోపిస్తున్నారు. ఫిజికల్​ఎడ్యుకేషన్​ లో మూడు సీట్లకు 56 మంది ఎంట్రన్స్​రాయగా.. అందులో టాప్​ స్కోరర్​కు ఓపెన్​ కేటగిరీలో ఇవ్వాల్సి ఉన్నా.. ఆ స్థానంలో వేరే వాళ్లకు అడ్మిషన్ ఇచ్చినట్లు తెలిసింది. ఇవే కాదు మెరిట్​లిస్ట్​, ఇంటర్వ్యూల్లో కూడా అవకతవకలకు పాల్పడినట్టు విద్యార్థి సంఘాల నేతలు ఆరోపిస్తున్నారు. ఇదిలా ఉంటే, కేటగిరీ–1లో మిగిలిన సీట్లను కేటగిరీ-–2లో ఫిలప్​ చేయాల్సి ఉండగా.. ఆ విషయంపై వర్సిటీ ఆఫీసర్లు స్పష్టత ఇవ్వడం లేదు.

అన్ని సంఘాలు ఏకమై..

పీహెచ్​డీ అడ్మిషన్లలో అక్రమాలు జరిగాయని వర్సిటీకి చెందిన అన్ని విద్యార్థి సంఘాలు ఐక్యంగా పోరాడుతున్నాయి. ఈ నెల మొదటి నుంచి ఆందోళనలు చేపట్టాయి. ఎవరూ స్పందించకపోవడంతో కొన్ని సంఘాల నేతలు 5న కేయూ ప్రిన్సిపల్ ఆఫీసు ఎదుట ధర్నాకు దిగారు. పోలీసులు వారిని స్టేషన్ కు తరలించి కొట్టడం, రిమాండ్​ కోసం జడ్జి ఎదుట ప్రవేశపెట్టగా పోలీసులు కొట్టిన విషయం చెప్పడంతో కేయూ పీహెచ్​డీ అడ్మిషన్ల విషయం రాష్ట్ర వ్యాప్తంగా చర్చనీయాంశమైంది. అప్పటినుంచి వర్సిటీ అట్టుడుకుతోంది. స్టూడెంట్​జేఏసీ నేతలంతా ఏకమై క్యాంపస్​లో ఆందోళనలు చేపడుతున్నారు. వీసీ ప్రొఫెసర్ తాటికొండ రమేశ్.. ఎమ్మెల్సీ పల్లా రాజేశ్వర్​రెడ్డి తొత్తుగా వ్యవహరిస్తున్నారని మండిపడుతున్నారు.

కమిటీ వేసి చర్యలు తీస్కుంటాం: గవర్నర్​ తమిళిసై

కేయూ పీహెచ్​డీ అడ్మిషన్లలో అక్రమాలపై విచారణ జరిపించి చర్యలు తీసుకోవాలని కోరుతూ విద్యార్థి సంఘాల నేతలు శుక్రవారం రాజ్​భవన్​లో గవర్నర్​తమిళిసైను  కలిసి వినతి పత్రం ఇచ్చారు. పోలీసులు అక్రమ కేసులు బనాయిస్తున్నారని, వరంగల్ సీపీపై యాక్షన్ తీసుకోవాలని కోరారు. ప్రొఫెసర్లు, డీన్ల రిక్రూట్​మెంట్లలోనూ అవకతవకలు జరిగాయని, రూ.2 కోట్లకు పైగా నిధుల దుర్వినియోగం చేశారని, భూముల కబ్జాలపై పట్టనట్టు వ్యవహరిస్తున్నారని తెలిపారు. గవర్నర్​స్పందిస్తూ.. పోలీసుల దాడిలో గాయపడిన రాంబాబు, శ్రీకాంత్ ను పరామర్శించారు. అడ్మిషన్లలో అవకతవకలపై కమిటీ వేసి విచారణ జరిపిస్తామని చెప్పారు. పోలీసుల తీరు, వర్సిటీలో నియామకాలపై ప్రత్యేక కమిటీతో ఎంక్వైరీ చేయించి చర్యలు తీసుకుంటామని స్పష్టం చేశారు. గవర్నర్​ను కలిసిన వారిలో కేయూ విద్యార్థి సంఘాల నేతలు మాచర్ల రాంబాబు, ఆరెగంటి నాగరాజు, అంకెళ్ల శ్రీకాంత్, నిమ్మల రాజేశ్, సుదగాని మధు గౌడ్, శ్రీకాంత్ గౌడ్, అజయ్ నాయక్ ఉన్నారు.

ఎవరికి భద్రత ఇస్తున్నరు:దుబ్బాక ఎమ్మెల్యే రఘునందన్

కేయూ స్టూడెంట్లను వరంగల్ సీపీ రంగనాథ్ క్రిమినల్స్ గా చిత్రీకరించే ప్రయత్నం చేస్తున్నారని దుబ్బాక ఎమ్మెల్యే రఘునందన్​రావు ఆందోళన వ్యక్తం చేశారు. స్టూడెంట్లపై దాడిని ఖండిస్తూ మానవ హక్కుల కమిషన్​ను ఆశ్రయిస్తామని స్పష్టం చేశారు. గాయపడిన స్టూడెంట్లను శుక్రవారం కేయూ క్యాంపస్​లో రఘునందన్ ​పరామర్శించారు. అనంతరం ఆయన మాట్లాడుతూ.. భద్రత మాదే.. బాధ్యత మాదేనని రింగ్​టోన్లు పెట్టుకున్న పోలీసులు ఎవరికి భద్రత ఇస్తున్నారని ప్రశ్నించారు. 5వ తేదీన మధ్యాహ్నం 12.30 గంటలకు అదుపులోకి తీసుకున్న స్టూడెంట్లను మేజిస్ట్రేట్​ఎదుట హాజరు పరిచేందుకు 12 గంటలు ఎందుకు పట్టిందని ప్రశ్నించారు. గన్​పెట్టి బెదిరించలేదని చెప్పినప్పుడే సీపీ సెల్ఫ్​డిఫెన్స్ లో పడ్డట్టు అర్థమైందన్నారు. విద్యార్థులను క్రిమినల్స్ గా ఎక్స్​పోజ్​చేస్తున్న రంగనాథ్​సీపీగా కొనసాగడం భావ్యమేనా అని ప్రశ్నించారు. పోలీసులు కొమ్ముకాస్తున్న పార్టీ ఇంకో నాలుగు నెలలు మాత్రమే అధికారంలో ఉంటుందన్నారు. చేతనైతే అక్రమాలపై విచారణ జరిపించాలని డిమాండ్​ చేశారు.

పెరుగుతున్న మద్దతు

విద్యార్థి నేతలపై పోలీసులు దాడి, అడ్మిషన్ల ప్రక్రియలో అవకతవకలను నిరసిస్తూ ఈ నెల 12న కాకతీయ యూనివర్సిటీ విద్యార్థి సంఘాల జేఏసీ ఆధ్వర్యంలో ఉమ్మడి వరంగల్ జిల్లా బంద్​కు పిలుపునిచ్చారు. ఇప్పటికే బీజేపీ, కాంగ్రెస్​, బీఎస్పీ, డీఎస్పీ, సీపీఐ పార్టీల నాయకులు పోలీసుల దాడిలో గాయపడిన విద్యార్థి నేతలను పరామర్శించి, నిరసన దీక్ష, బంద్​కు మద్దతు తెలుపుతున్నారు. కేయూ జేఏసీ నేతలు శుక్రవారం ఎస్​డీఎల్​సీఈ ఎదుట వరంగల్– -కరీంనగర్​ మెయిన్​రోడ్డుపై ధర్నా చేపట్టారు. వీసీ దిష్టిబొమ్మను దహనం చేశారు.