హైదరాబాద్, వెలుగు: కాళేశ్వరం జ్యుడీషియల్ కమిషన్ గడువు మరోసారి పొడిగించే అవకాశాలు కనిపిస్తున్నాయి. కమిషన్ గడువు ఈ నెలాఖరుతో ముగియనుండడం.. మరింత మందిని ఓపెన్ కోర్టులో క్రాస్ ఎగ్జామినేషన్ చేయాల్సి ఉండడంతో గడువును మరోసారి పొడిగించాల్సిన అనివార్యత ఏర్పడింది. ఇప్పటిదాకా ఐఏఎస్లు, రిటైర్డ్ ఐఏఎస్లు, రిటైర్డ్ ఈఎన్సీలు, ప్రస్తుతం పనిచేస్తున్న ఇంజినీరింగ్ అధికారులు సహా వందమందికిపైగా కమిషన్ విచారించింది.
ఈ దఫాలో మాజీ సీఎస్లు సోమేశ్ కుమార్, ఎస్కే జోషి, రిటైర్డ్ ఐఏఎస్ రజత్ కుమార్, టూరిజం ప్రిన్సిపల్సెక్రటరీ స్మిత సబర్వాల్, స్పెషల్ చీఫ్ సెక్రటరీ వికాస్ రాజ్తోపాటు కేంద్ర జలశక్తి శాఖ సలహాదారు వెదిరె శ్రీరామ్, కోదండరామ్లను కమిషన్ ఎంక్వైరీ చేసింది. ఇందులో భాగంగా కాళేశ్వరం ప్రాజెక్టులోని మేడిగడ్డ కుంగుబాటు, అన్నారం, సుందిళ్ల బ్యారేజీలపై కీలకమైన సమాచారాన్ని సేకరించినట్టు తెలిసింది.
అయితే, క్రాస్ ఎగ్జామినేషన్లో భాగంగా మరో 15 నుంచి 20 మందిని విచారించాల్సిన అవసరం ఉన్నట్టు తెలిసింది. ప్రస్తుత ఫేజ్లో ఫైనాన్స్ స్పెషల్ సీఎస్ రామకృష్ణా రావును క్రాస్ఎగ్జామినేషన్ చేయాల్సి ఉన్నా.. రాజస్థాన్లో నిర్వహిస్తున్న ప్రీ బడ్జెట్ సమావేశానికి వెళ్లడంతో ఆయన ఈ దఫా విచారణకు హాజరు కాలేకపోయారు. శనివారం కాంట్రాక్ట్ సంస్థలను విచారించాలని నిర్ణయించినా.. అందుబాటులో లేనట్టు తెలిసింది. దీంతో తదుపరి విచారణను జనవరిలో నిర్వహించే అవకాశాలున్నట్టు తెలుస్తున్నది.
