హైదరాబాద్, వెలుగు: కాళేశ్వరం జ్యుడీషియల్ కమి షన్ ఓపెన్ కోర్టు మంగళవారం నుంచి మళ్లీ ప్రారంభం కానున్నది. సోమవారం రాత్రి కమిషన్ చైర్మన్ జస్టిస్ పినాకి చంద్రఘోష్ హైదరాబాద్కు రానున్నారు. అనంతరం ఆయన విచారణకు పిలవాల్సిన అధికారుల జాబితాను తయారు చేసి అధికారులకు ఇస్తారని తెలిసింది. మంగళవారం నుంచి ఓపెన్ కోర్టును మళ్లీ షురూ చేయనున్న కమిషన్.. పోయినసారి ఆపిన దగ్గర్నుంచే ఈ దఫా ప్రారంభించాలని నిర్ణయించినట్టు సమాచారం.
రిటైర్డ్ ఈఎన్సీ నల్లా వెంకటేశ్వర్లుతోనే విచారణ పున:ప్రారంభిస్తారని అధికార వర్గాలు చెప్తున్నాయి. గత నెల 28న రిటైర్డ్ ఈఎన్సీ వెంకటేశ్వర్లును కమిషన్ సుదీర్ఘంగా విచారించింది. ఆయన నుంచి మరిన్ని వివరాలు రాబట్టేందుకు మరోసారి ఎంక్వైరీ చేయనున్నది. ఈసారి విచారణలో భాగంగా మాజీ సీఎస్, ఇరిగేషన్ శాఖకు అప్పట్లో సెక్రటరీలుగా పనిచేసిన ఐఏఎస్లు, ఆర్థిక శాఖ కార్యదర్శులను ఓపెన్ కోర్టుకు పిలవొచ్చని తెలుస్తోంది.
