- కాళేశ్వరానికి చీఫ్ ఇంజనీర్, డిజైనర్, కాంట్రాక్టర్ నేనే అన్న కేసీఆర్: కోమటిరెడ్డి వెంకట్రెడ్డి
హైదరాబాద్, వెలుగు: ప్రపంచంలో 8వ వింత, తన మానస పుత్రిక అని కేసీఆర్ చెప్పుకున్న కాళేశ్వరంలోని మేడిగడ్డ మూడేండ్లకే కూలిందని ఆర్ అండ్ బీ మంత్రి కోమటిరెడ్డి వెంకట్రెడ్డి ఎద్దేవా చేశారు. శనివారం హెచ్ఐసీసీలో భారత్ సమ్మిట్ లో వెంకటరెడ్డి మీడియాతో మాట్లాడారు. మేడిగడ్డతో పాటు, అన్నారం, సుందిళ్ల కూడా ఉండవని ఎన్ డీఎస్ఏ రిపోర్ట్ లో పేర్కొందన్నారు.
అక్కడ నీళ్లు నిలిపి ఉంటే ఇప్పటికే ఆ మూడు బ్యారేజీలు కొట్టుకుపోయేవన్నారు. వాటి నిర్మాణంలో నాణ్యత లోపం ఉందన్నారు. కాళేశ్వరం ప్రాజెక్టుకు చీఫ్ ఇంజనీర్, డిజైనర్, కాంట్రాక్టర్.. మొత్తం కేసీఆరే అని, ఆయన తన మానస పుత్రికని అని చెప్పేవారని అన్నారు. ప్రపంచంలో 8వ వింత అని ఆ పార్టీ నేతలు చెప్పేవారని.. మూడేండ్లలో కట్టడం, కూలిపోవడం రెండు జరిగాయని, అదే నిజమయిందని ఎద్దేవా చేశారు.
