మహదేవపూర్, వెలుగు: జయశంకర్ భూపాలపల్లి జిల్లా మహదేవపూర్ మండలం కాళేశ్వరం టెంపుల్ ఇన్చార్జి ఈవో మారుతి పై వేటు పడింది. గర్భగుడిలో సింగర్ మధు ప్రియ పాట షూటింగ్ చేయడంతో రాష్ట్ర వ్యాప్తంగా చర్చలకు తావివ్వగా దేవాదాయ శాఖ ఈవోను బదిలీ చేస్తూ ఆదివారం ఉత్తర్వులు జారీ చేసింది. సింగర్ మధు ప్రియ జనవరి 20 న టెంపుల్ లో షూటింగ్ కోసం ఫోన్లో ఇన్చార్జి ఈవో మారుతి అనుమతి తీసుకుంది.
అదేరోజు ఆయనతో పాటు ఆలయ సిబ్బంది, అర్చకులు కాళేశ్వరంలో కార్యక్రమానికి ఆహ్వానించేందుకు శృంగేరి పీఠానికి వెళ్లారు. గర్భగుడిలో షూటింగ్ చేయడంపై భక్తులు, ప్రజా సంఘాలు , వివిధ రాజకీయ పార్టీ నాయకులు ఆగ్రహం వ్యక్తం చేస్తూ ధర్నాలు చేశారు. దీంతో ఈవోను ఇన్చార్జి బాధ్యతల నుంచి తొలగిస్తూ దేవాదాయ శాఖ అడిషనల్ కమిషనర్ జ్యోతి ఉత్తర్వులు జారీ చేశారు.
