- కిడ్నీ సంబంధ సమస్యతో మరణించిన రవికుమార్
- కండ్లు డొనేట్ చేసిన కుటుంబ సభ్యులు
హనుమకొండ, వెలుగు : ప్రజాకవి కాళోజీ నారాయణరావు ఒక్కగానొక్క కొడుకు రవికుమార్(68) అనారోగ్యంతో కన్నుమూశారు. కాళోజీ జయంతి ఉత్సవాలు ముగిసిన మరునాడే ఆయన చనిపోయారు. ఆంధ్రాబ్యాంక్ ఉద్యోగిగా పని చేసిన రవికుమార్ కొంతకాలం కింద అనారోగ్య సమస్యలతో వాలంటరీ రిటైర్మెంట్తీసుకున్నారు. కిడ్నీ సంబంధిత సమస్యలు తలెత్తడంతో కొద్దిరోజులుగా ట్రీట్మెంట్ తీసుకుంటున్నారు. గత వారం సమస్య తీవ్రం కావడంతో కుటుంబసభ్యులు హనుమకొండ ఆరెపల్లి సమీపంలోని ప్రతిమా హాస్పిటల్ లో అడ్మిట్ చేశారు. అక్కడ చికిత్స పొందుతూ ఆదివారం మధ్యాహ్నం 12.10 గంటలకు తుదిశ్వాస విడిచారు. రవి కుమార్ మృతికి పలువురు కవులు, కళాకారులు, సాహితీవేత్తలు సంతాపం తెలిపారు.
ALSO READ :ఔట్సోర్సింగ్ పంచాయతీ సెక్రటరీలకు జీతాల్లేవు
ఇప్పటికే కాళోజీ నారాయణరావుతో పాటు ఆయన అన్న రామేశ్వరరావు మృతదేహాలను కాకతీయ మెడికల్ కాలేజీకి డొనేట్చేయగా.. రవికుమార్ కుటుంబసభ్యుల అంగీకారంతో ఆయన కండ్లను తెలంగాణ నేత్రదాతల అసోసియేషన్ వరంగల్ జిల్లా అధ్యక్షుడు కొన్రెడ్డి మల్లారెడ్డి ఆధ్వర్యంలో ఎల్వీ ప్రసాద్ఐ హాస్పిటల్కు అప్పగించారు. రవికుమార్కు భార్య వాణి, కొడుకు సంతోష్ ఉన్నారు. సంతోష్ అమెరికాలో ఉద్యోగం చేస్తుండగా.. తండ్రి ఆరోగ్యం బాగోలేకపోవడంతో ఇటీవలే వరంగల్ వచ్చారు. అంత్యక్రియలు సోమవారం ఉదయం హనుమకొండలోని పద్మాక్షి శివ ముక్తి స్థల్ లో నిర్వహించనున్నారు.
కేంద్ర మంత్రి కిషన్ రెడ్డి విచారం
హైదరాబాద్: రవి కుమార్మరణంపై కేంద్ర మంత్రి కిషన్రెడ్డి విచారం వ్యక్తం చేశారు. కాళోజీ జయంతి, తెలంగాణ భాషాదినోత్సవం జరుపుకున్న తర్వాత రోజే ఇలా జరగడం బాధాకరమన్నారు. రవికుమార్ ఆత్మకు శాంతి చేకూరాలన్న ఆయన.. కుటుంబసభ్యులకు సానుభూతిని తెలియజేశారు.
