- కామారెడ్డి కలెక్టర్ఆశిశ్ సంగ్వాన్
కామారెడ్డి టౌన్, వెలుగు: ఇందిరమ్మ ఇండ్ల సర్వే జనవరి3లోగా కంప్లీట్ చేయాలని కామారెడ్డి కలెక్టర్ఆశిశ్ సంగ్వాన్ సూచించారు. శనివారం కలెక్టరేట్లో ఇందిరమ్మ ఇండ్ల సర్వే, శానిటేషన్, తాగునీటి సరఫరా, కంపోస్టు ఎరువు తయారీ, ఉపాధి హామీ స్కీమ్, మహిళాశక్తి తదితర అంశాలపై ఎంపీడీవోలు, ఎంపీవోలు, ఇంజనీరింగ్ అధికారులతో రివ్యూ నిర్వహించారు. ఈ సందర్భంగా కలెక్టర్ మాట్లాడుతూ.. సర్వేను స్పీడప్ చేయాలన్నారు. జిల్లాలో ఇండ్ల కోసం 2,38,682 మంది దరఖాస్తు చేసుకోగా ఇప్పటి వరకు 1,39,194 అప్లికేషన్లపై సర్వే పూర్తయిందని, మిగతావి గడువులోగా పరిశీలించాలన్నారు.
మురుగు రోడ్లపై నిల్వకుండా చూడాలని, డ్రైనేజీలు క్లీన్గా ఉంచాలని పారిశుద్ధ్య కార్మికులను ఆదేశించారు. రానున్న వేసవిని దృష్టిలో ఉంచుకొని తాగునీటి సమస్య తలెత్తకుండా ముందస్తు ప్రణాళికలు సిద్ధం చేయాలన్నారు. పైపులైన్లు లీకేజీలకు రిపేర్లు చేయించాలని ఆదేశించారు. జాబ్కార్డు కలిగిన ప్రతి ఒకరికి ఉపాధి పనులు కల్పించాలన్నారు. అడిషనల్ కలెక్టర్లు వి.విక్టర్, శ్రీనివాస్రెడ్డి, డీఆర్డీవో సురేందర్, ఆయా శాఖల ఆఫీసర్లు పాల్గొన్నారు.
