కామారెడ్డి, వెలుగు: కామారెడ్డి జిల్లా బీబీపేట తహసీల్దార్ ఆఫీసులో జూనియర్అసిస్టెంట్ గా పని చేస్తున్న మర్కంటి శ్రీకాంత్( 27) మంగళవారం చెరువులో దూకి ఆత్మహత్య చేసుకున్నారు. ఇతడి అన్న గణేశ్ (29) కూడా రెండునెలల క్రితం సూసైడ్ చేసుకున్నాడు. జీతం రాక, పైసలకు ఇబ్బంది అవుతుండడంతో శ్రీకాంత్ కొన్నాళ్లుగా మానసిక వేదన అనుభవిస్తున్నాడని తండ్రి పోలీసులకు ఇచ్చిన ఫిర్యాదులో పేర్కొన్నాడు. పోలీసులు, స్థానికుల కథనం ప్రకారం...భిక్కనూరు మండలం బస్వాపూర్కు చెందిన మర్కంటి నాగరాణి, శంకరయ్యలకు ఇద్దరు కొడుకులు.
పెద్ద కొడుకు గణేశ్ హైదరాబాద్లోని ఓ కంపెనీలో ప్రైవేట్ జాబ్ చేసేవాడు. రెండో కొడుకు శ్రీకాంత్ గ్రామ వీఆర్ఏ కాగా, విలీనంలో భాగంగా కొన్ని నెలల కింద ప్రభుత్వం ఇతడిని బీబీపేట తహసీల్దార్ఆఫీసులో జూనియర్అసిస్టెంట్గా నియమించింది. అప్పటి నుంచి జీతం ఇవ్వడం లేదు. దీంతో సొంతూరు బస్వాపూర్లోనే ఉంటూ బీబీపేటకు వెళ్లి వచ్చేవాడు. మంగళవారం డ్యూటీకి వెళ్తున్నానని ఇంట్లో నుంచి లంచ్ బాక్స్ తీసుకుని బీబీపేటకు వెళ్లాడు. తర్వాత తల్లి ఫోన్చేయగా ఇంకా ఆఫీసు తీయలేదని చెప్పాడు.
కొద్దిసేపటికే బీబీపేట చెరువుకు వెళ్లి కట్టపై బైక్ పార్క్ చేసి ఆధార్కార్డు పెట్టి చెరువులో దూకి ఆత్మహత్య చేసుకున్నాడు. జాబ్లో జాయిన్ అయినా జీతం రావట్లేదని తన కొడుకు బెంగ పెట్టుకున్నాడని, పైసలకు ఇబ్బంది అవుతుందని చెప్పేవాడని మృతుడి తండ్రి శంకరయ్య పోలీసులకు ఇచ్చిన ఫిర్యాదులో పేర్కొన్నారు. శంకరయ్య పెద్ద కొడుకు గణేశ్గత ఏడాది నవంబర్లో హైదరాబాద్లో ఉరేసుకున్నాడు. ఆ విషాదం నుంచి ఇంకా తేరుకోకముందే చిన్న కొడుకు చనిపోవడంతో ఆ తల్లిదండ్రులను తీవ్ర విషాదంలో మునిగిపోయారు.
