- సీఎం కేసీఆర్ పోటీతో రసవత్తరంగా మారిన స్థానిక రాజకీయం
- తాము బరిలో ఉంటామంటున్న లబాన్ లంబాడీలు, గల్ఫ్బాధితులు,ఫౌల్ట్రీ సంఘం ప్రతినిధులు
కామారెడ్డి, వెలుగు : రాష్ట్ర రాజకీయాల్లో కామారెడ్డి హాట్ టాపిక్గా మారింది. ప్రధాన పార్టీల ముఖ్య నేతలు ఇక్కడి నుంచి పోటీకి సై అంటుండగా, తమ డిమాండ్ల సాధన కోసం ప్రయత్నిస్తున్న వివిధ వర్గాలు సైతం కామారెడ్డి వైపు చూస్తున్నాయి. అసెంబ్లీ ఎన్నికల్లో ఇక్కడి నుంచి బీఆర్ఎస్తరఫున సీఎం కేసీఆర్బరిలో నిలువనుండగా, తాజాగా కాంగ్రెస్ తరఫున ఇక్కడి నుంచి రేవంత్రెడ్డి పోటీ చేస్తారనే ప్రచారం జరుగుతోంది. కేసీఆర్ను కట్టడిచేయడానికి ఇక్కడ రేవంత్రెడ్డిని పోటీకి దింపాలని అధిష్టానవర్గం భావిస్తుందనే ప్రచారం జరుగుతోంది. అధిష్టానం ఆదేశిస్తే తాను పోటీకి సిద్ధమని రేవంత్రెడ్డి సైతం పేర్కొన్నారు.
వివిధ సమీకరణల నేపథ్యంలో రేవంత్ ఇక్కడి నుంచి పోటీ చేయకపోవచ్చనే అభిప్రాయాలు సైతం వ్యక్తమవుతున్నాయి. కాగా కామారెడ్డి నుంచి తానే బరిలో ఉంటానని మాజీ మంత్రి షబ్బీర్అలీ గతంలో ప్రకటించారు. ఫస్ట్, సెకండ్ లిస్టుల్లో కామారెడ్డి అభ్యర్థిని కాంగ్రెస్ ప్రకటించకపోవడంతో పొలిటికల్గా చర్చలకు తావిస్తోంది. బీజేపీ స్థానిక నేతకే అభ్యర్థిత్వాన్ని ఖరారు చేసింది. మాజీ జడ్పీ చైర్మన్ కాటిపల్లి వెంకటరమణారెడ్డి ఆ పార్టీ తరఫున బరిలో నిలువనున్నారు.
ఈయన గత ఎన్నికల్లోనూ బీజేపీ తరఫున నిలబడి ఓడిపోయారు. అనంతరం అయిదేండ్లుగా నియోజకవర్గంపై స్పెషల్ ఫోకస్చేశారు. వివిధ సమస్యలపై ఆందోళనలు చేస్తూ నిరంతరం ప్రజల్లో ఉన్నారు. కేసీఆర్పై బీజేపీ నుంచి ముఖ్య నేతలు పోటీ చేస్తారని ప్రచారం జరిగినా, అధిష్టానం చిరవకు రమణారెడ్డికే ఓకే చెప్పింది.
కేఏ పాల్ సైతం..
కామారెడ్డి నుంచి ప్రజాశాంతి పార్టీ చీఫ్ కేఏ పాల్కూడా పోటీకి సై అంటున్నారు. మాస్టర్ ప్లాన్ బాధిత రైతులు కేసీఆర్ పై వంద నామినేషన్లు వేస్తామని ఇటీవల ప్రకటించారు. మూడు రోజుల కింద అడ్లూర్ఎల్లారెడ్డిలో బాధిత రైతులతో సమావేశమైన పాల్ వచ్చారు. వంద మంది కాకుండా రైతులంతా కలిసి ఒకరిని మాత్రమే బరిలో నిలపాలని కోరారు.
తమ తరఫున పోటీ చేయాలని పాల్ను కొందరు రైతులు కోరాగా, రైతులతో మరో సారి సమావేశమై నిర్ణయాన్ని వెల్లడిస్తానని ప్రకటించారు. శనివారం మాస్టర్ప్లాన్ బాధిత రైతు ఐక్య కార్యచరణ కమిటీ ప్రతినిధులు మంత్రి కేటీఆర్ను కలిశారు. ఈ పరిస్థితుల్లో వారి నిర్ణయం ఎలా ఉంటుందనేది తేలియాల్సి ఉంది.
డిమాండ్ల సాధన కోసం..
రాజకీయ పార్టీలే కాకుండా వివిధ సమస్యల పరిష్కారం కోసం పోరాడుతున్న వారు సైతం ఇక్కడి నుంచి బరిలో నిలుస్తామని ప్రకటించారు. లబాన్(కాయితీ) లంబాడీలు, గల్ఫ్బాధిత సంఘం ప్రతినిధులు, స్థానిక ఫౌల్ట్రీ రైతు ప్రతినిధులు కూడా బరిలో ఉంటామని స్పష్టం చేశారు.
