- కాంగ్రెస్, బీఆర్ఎస్ క్యాంపులు అక్కడే
- చైర్పర్సన్పై అవిశ్వాసం మీటింగ్ ఈనెల 30న
కామారెడ్డి, వెలుగు : కామారెడ్డి మున్సిపల్ రాజకీయం గోవాకు షిఫ్ట్ అయ్యింది. కాంగ్రెస్ పార్టీకి చెందిన 27 మంది కౌన్సిలర్లు గోవాలోని ఒక చోట క్యాంపు పెట్టగా, బీఆర్ఎస్ పార్టీలో ఒక వర్గానికి చెందిన 8 మంది కౌన్సిలర్లు అక్కడే మరో చోట క్యాంపు నిర్వహిస్తున్నారు. కామారెడ్డి మున్సిపాలిటీలో 49 మంది కౌన్సిలర్లుండగా, ప్రస్తుతం 35 మంది గోవాలోనే మకాం వేశారు. కామారెడ్డి మున్సిపల్ చైర్పర్సన్మీద అవిశ్వాసం ప్రతిపాదించడంతో రెండు పార్టీలు క్యాంపు రాజకీయాలకు తెర తీశాయి.
బీఆర్ఎస్కు చెందిన చైర్పర్సన్ నిట్టు జాహ్నవిపై కాంగ్రెస్కు చెందిన 27 మంది కౌన్సిలర్లు అవిశ్వాసం ప్రకటిస్తూ ఈ నెల 11న కలెక్టర్ జితేశ్ వి పాటిల్కు లేఖ ఇచ్చారు. అవిశ్వాసంపై ఈనెల 30 న మీటింగ్ నిర్వహించనున్నట్టు కలెక్టర్ నోటీసులు ఇచ్చారు. అవిశ్వాసాన్ని పెట్టిన వెంటనే కాంగ్రెస్ కౌన్సిలర్లు ప్రత్యేక బస్సుల్లో క్యాంపునకు బయలుదేరారు. ఐదారు రోజులు హైదరాబాద్చుట్టుపక్కనే మకాం వేసిన వారు గోవాకు తరలివెళ్లారు.
బీఆర్ఎస్లో రెండు గ్రూపులు
బీఆర్ఎస్లో చైర్పర్సన్ను కలుపుకొని 16 మంది కౌన్సిలర్లు ఉన్నారు. వీరిలో చైర్ పర్సన్ పట్ల అసంతృప్తితో ఉన్న 8 మంది గోవాలో నిర్వహిస్తున్న క్యాంపునకు వెళ్లారు. మిగిలిన 8 మంది మాత్రం స్థానికంగానే ఉన్నారు. 35మంది సభ్యులు హాజరయితేనే అవిశ్వాసం మీటింగ్ కు కోరం ఉన్నట్టు పరిగణిస్తారు. కాంగ్రెస్తో ఇప్పుడున్న 27 మందితో పాటు బీఆర్ఎస్నుంచి మరో 8 మంది మద్దతు అవసరం. బీజేపీకి ఆరుగురు కౌన్సిలర్లుండగా వారు అవిశ్వాసంపై తటస్థంగా ఉన్నారు.
వారి మద్దతు దొరికే అవకాశం లేకపోవడంతో కాంగ్రెస్ లీడర్లు క్యాంపులో ఉన్న బీఆర్ఎస్కౌన్సిలర్లను ఆకర్శించే పని ఉన్నారు. వారు కాంగ్రెస్ కు మద్దతు ఇవ్వకుండా బీఆర్ఎస్ లీడర్లు జాగ్రత్త పడుతున్నారు. బీఆర్ఎస్ సభ్యులు మీటింగ్కు హాజరు కాకపోతే కోరం లేక మీటింగ్ జరిగే అవకాశం ఉండదు.
మీటింగ్ జరగకుండా చేసి చైర్ పర్సన్ పదవిని నిలబెట్టుకోవాలని బీఆర్ఎస్ ప్రయత్నిస్తోంది. మరో 5 రోజుల్లో అవిశ్వాసంపై మీటింగ్ జరగనుండగా.. ఎవరు పైచేయి సాధిస్తారన్నది ఆసక్తిగా మారింది.
