- మహిళా పోలీసులు లేకుండా అర్ధరాత్రి ఎలా తనిఖీలు చేస్తారని చైర్ పర్సన్ ఆగ్రహం
కామారెడ్డి, వెలుగు : కామారెడ్డి మున్సిపల్ వైస్ చైర్పర్సన్ గడ్డం ఇందుప్రియ ఇంట్లో సోమవారం అర్ధరాత్రి పోలీసులు సోదాలు చేశారు. మహిళా పోలీసులు లేకుండా తనిఖీలు చేయడంపై ఇందుప్రియ అభ్యంతరం తెలిపారు. ఈ విషయం తెలిసి కాంగ్రెస్ పార్టీ లీడర్లు, కార్యకర్తలు అక్కడకు పెద్ద సంఖ్యలో చేరుకున్నారు. ఈ క్రమంలో డీఎస్పీ ప్రకాష్, లీడర్ల మధ్య వాగ్వాదం జరిగింది. అర్ధరాత్రి సోదాలు చేయడం ఏంటని ఇందుప్రియ నిలదీశారు. తమకు ఫిర్యాదు వస్తే వచ్చామని డీఎస్పీ చెప్పారు.
‘‘ఫిర్యాదు చేస్తే వచ్చారా? లేక బీఆర్ఎస్ వాళ్లు పంపించారా?”అంటూ ఇందుప్రియ ప్రశ్నించారు. కేవలం కాంగ్రెస్ నాయకుల ఇళ్లలోనే సోదాలు చేస్తున్నారంటూ డీసీసీ ప్రెసిడెంట్ శ్రీనివాస్రావు పేర్కొన్నారు. తాను బీఆర్ఎస్ను వీడి కాంగ్రెస్ లో చేరినప్పటి నుంచి ఇబ్బందులకు గురిచేస్తున్నారని వాపోయారు. కాగా, కాంగ్రెస్ పార్టీ కామారెడ్డి రూరల్ ప్రెసిడెంట్ గూడెం శ్రీనివాస్రెడ్డి ఆఫీసులో మంగళవారం ఫ్లయింగ్ స్క్వాడ్, పోలీసు అధికారులు తనిఖీలు చేశారు. సోదాల్లో కొంత నగదు లభించిందని అధికారులు చెప్పారు. అయితే ఎంత నగదు దొరికిందో వెల్లడించలేదు.
