- పన్నుల రూపంలో రూ.12.95 కోట్ల ఆదాయం
- జనరల్ బాడీ మీటింగ్లో ఎజెండాపై సభ్యుల అభ్యంతరం
కామారెడ్డి, వెలుగు: 2024–25 ఏడాదికి సంబంధించి రూ.42.28 కోట్లతో కామారెడ్డి మున్సిపాలిటీ బడ్జెట్ను ఆమోదించారు. మున్సిపల్చైర్పర్సన్ నిట్టు జాహ్నవి అధ్యక్షతన స్థానిక కళాభారతిలో శుక్రవారం బడ్జెట్ మీటింగ్ నిర్వహించారు. కలెక్టర్ జితేశ్వీ పాటిల్, అడిషనల్ కలెక్టర్ మనూచౌదరి, సభ్యులు, ఆఫీసర్లు హాజరయ్యారు. పన్నుల రూపంలో రూ. 12.95 కోట్లు, రెంట్లు, టౌన్ప్లానింగ్, పబ్లిక్ హెల్త్ ద్వారా రూ.13.68 కోట్లు, వివిధ గ్రాంట్ల ద్వారా రూ.16 కోట్లు సమకూరుతాయని చైర్పర్సన్ జాహ్నవి పేర్కొన్నారు. మున్సిపల్సిబ్బంది జీతాలకు రూ.2.96 కోట్లు, ఇంజనీరింగ్, ఇతర పనుల కోసం రూ.2.38 కోట్లు, నాన్ ప్లానింగ్గ్రాంట్ల కింద రూ.15.42 కోట్ల ఖర్చులకు ఆమోదం లభించింది.
టౌన్లో మౌలిక వసతులు కల్పించాలి: కలెక్టర్
కామారెడ్డిలో మెరుగైన సౌకర్యాల కల్పనకు కృషి చేయాలని కలెక్టర్ జితేశ్ వీ పాటిల్ సూచించారు. బడ్జెట్ మీటింగ్లో ఆయన మాట్లాడుతూ.. ఆదాయ వనరులను సమకూర్చుకునేందుకు ప్రయార్టీ ఇవ్వాలన్నారు. కమర్షియల్ ఏరియాల్లో యూజర్ చార్జీలు, పన్నుల వసూళ్లతో ఆదాయం పెంచుకొని వార్డుల్లో అభివృద్ధి పనులు చేపట్టాలన్నారు. వేసవికాలంలో తాగునీటికి ఇబ్బందులు తలెత్తకుండా చర్యలు తీసుకోవాలన్నారు. అడిషనల్ కలెక్టర్ మనూచౌదరి మాట్లాడుతూ.. జనాభా ప్రాతిపదికన శానిటేషన్, వాటర్వర్క్స్ సిబ్బందిని హేతుబద్ధీకరించాలన్నారు. కమిషనర్ సుజాత, కౌన్సిలర్లు పాల్గొన్నారు.
ఎజెండాపై అంశాలపై ఎటూ తేల్చలే..
వేసవి దృష్ట్యా ఆయా వార్డుల్లో నీటి ఎద్దడి నివారణకోసం తయారు చేసిన యాక్షన్ ప్లాన్, టెబుల్ ఎజెండా అంశాలపై బీజేపీ, కాంగ్రెస్ సభ్యులు అభ్యంతరం తెలిపారు. మీటింగ్ వాయిదా వేయాలంటూ నోటీసు ఇచ్చారు. యాక్షన్ ప్లాన్లో కొన్ని వార్డులకే ప్రయార్టీ ఇచ్చారని, కౌన్సిలర్లందరి అభిప్రాయాలను పరిగణనలోకి తీసుకోలేదన్నారు. ట్యాంకర్లను కొన్ని వార్డులకే ప్రతిపాదించడం సరికాదన్నారు. కార్మికుల నెలల తరబడి జీతాలను పెండింగ్లో పెట్టి, అభివృద్ధి పనుల బిల్లుల చెల్లించేందుకు ప్రతిపాదించడం ఏమిటని ప్రశ్నించారు. చైర్పర్సన్, కమిషనర్ నచ్చజెప్పే ప్రయత్నం చేసినా సభ్యులు వినిపించుకొలేదు. సభ్యుల అభ్యంతరాలతో ఏజెండా అంశాలపై పూర్తి స్థాయిలో చర్చించకుండానే మీటింగ్ను వాయిదా వేశారు.
