నస్పూర్, వెలుగు: సింగరేణి సంస్థలో కాంట్రాక్టీకరణ ఆగాలంటే ఐఎన్టీయూసీ రావాలని ఆ సంఘం కేంద్ర ఉపాధ్యక్షుడు కాంపెల్లి సమ్మయ్య, శంకర్ రావు అన్నారు. గురువారం శ్రీరాంపూర్ ఏరియాలోని ఆర్కే7 గనిపై జరిగిన గేట్ మీటింగ్లో మాట్లాడారు. మొన్నటి వరకు గుర్తింపు కార్మిక సంఘంగా ఉన్న టీబీజీకేఎస్ నాయకుల వైఫల్యాలు, అవినీతి అక్రమాల మూలంగానే సింగరేణి సంస్థకు, కార్మికులకి తీరని అన్యాయం జరిగిందన్నారు.
సింగరేణిలో విచ్చలవిడిగా పెరిగిన కాంట్రాక్టీకరణను ఆపాలంటే గుర్తింపు కార్మిక సంఘం ఎన్నికల్లో ఐఎన్టీయుసీని గెలిపించాలని కోరారు. ఈ సందర్భంగా ఏఐటీయూసీ, టీబీజీకేస్ యూనియన్ల నుంచి 100 మంది కార్మికులు ఐఎన్టీయూసీలో చేరారు. ఈ కార్యక్రమంలో స్థానిక లీడర్లు కలవేణి శ్యామ్, గరిగె స్వామి, తిరుపతి రెడ్డి, భీం రావు, సమ్ము రాజయ్య, రాఘవరెడ్డి, ఎల్.శ్రీనివాస్, సమ్మిరెడ్డి, మహేశ్, కొలిపాక సమ్మయ్య, వెంకటస్వామి తదితరులు పాల్గొన్నారు.
