భద్రాచలం, వెలుగు : ధనుర్మాస మహోత్సవాల్లో భాగంగా 27వ రోజైన శనివారం భద్రాద్రి రామాలయంలో కూడారై ఉత్సవాన్ని భక్తిప్రవత్తులతో నిర్వహించారు. రామాలయ ప్రాంగణంలో గోదాదేవి అమ్మవారికి ప్రత్యేక పూజలు చేశారు. ఈ సందర్భంగా తిరుప్పావై, తిరుపళ్లేచ్చి అను ద్రవిడ ప్రబంధాలను నివేదన సమయంలో అనుసంధానం చేశారు. గోదాదేవి అమ్మవారు శ్రీరంగనాథుడితో తన వివాహం జరిగితే 108 గంగాళాలతో పాయసాన్నం నివేదన చేస్తానని సుందర బాహుస్వామికి మొక్కుకుంటుంది. ఈ సమంయలో అమ్మవారితో శ్రీరంగనాథుని వివాహం జరగడం, ఆయనలో ఐక్యం అవడం జరిగింది.
ఈ నేపథ్యంలో ప్రతిఏటా ధనుర్మాస మహోత్సవం రామాలయంలో నిర్వహించడం ఆనవాయితీగా వస్తోంది. కార్యక్రమంలో స్థానాచార్యులు స్థలసాయి, ప్రధానార్చకులు అమరవాది విజయరాఘవన్, రామస్వరూపాచార్యులు పాల్గొన్నారు. కాగా అధ్యయనోత్సవాల్లో ముక్కోటి ఏకాదశి ఉత్తర ద్వారదర్శనం పగల్పత్ ఉత్సవాలు ముగియడంతో ఆలయంలో నిత్య కల్యాణాలు తిరిగి శనివారం నుంచి ప్రారంభమయ్యాయి. సాయంత్రం గోదాదేవి అమ్మవారికి తిరువీధి సేవ జరిగింది. రాపత్ ఉత్సవాల్లో భాగంగా అంబసత్రంలో స్వామికి సేవ నిర్వహించారు.
చండ్రుగొండ : చండ్రుగొండ లో ని వేణుగోపాలస్వామి ఆలయంలో కుడారై ఉత్సవాన్ని మహిళలు భక్తి శ్రద్ధలతో నిర్వహించారు. 108 గిన్నెలలో ప్రసాదాలను పెట్టి శంఖు, చక్ర, నామాలు గా ఏర్పాటు చేసి ప్రత్యేక పూజలు చేసి నైవేద్యం గా సమర్పించారు.
