నల్గొండ అర్బన్, వెలుగు: నల్గొండ టౌన్లో త్వరలో ప్రారంభంకానున్న ఐటీ హబ్ సెంటర్లో 3,600 మంది ఉద్యోగాలు లభిస్తాయని ఎమ్మెల్యే కంచర్ల భూపాల్ రెడ్డి తెలిపారు. శుక్రవారం లక్ష్మీగార్డెన్స్లో ఏర్పాటు చేసిన జాబ్ మేళాను ప్రారంభించారు. ఈ సందర్భంగా ఆయన మాట్లాడుతూ ఇప్పటి వరకు 15 కంపెనీలు ముందుకొచ్చాయని, మరో 50 కంపెనీలు కూడా ఆసక్తిగా ఉన్నాయని చెప్పారు.
మంత్రులు జగదీశ్‌ రెడ్డి, కేటీఆర్ చొరవతో జిల్లాలో రూ.95 కోట్లతో ఐటీ హబ్సెంటర్ ఏర్పాటు చేశామని చెప్పారు. జాబ్ మేళాలో 15,316 మంది అప్లై చేసుకోగా.. 3,216 మందిని అర్హులుగా ఎంపిక చేసినట్లు తెలిపారు. వీరికి జీఎస్సార్, కేబీకే, బీసీడీసీ క్లౌడ్ కంపెనీల్లో ప్లేస్‌మెంట్‌ ఇస్తామని వివరించారు. ఈ కార్యక్రమంలో అడిషనల్‌ కలెక్టర్ హేమంత్ కేశవ్ పాటిల్, మున్సిపల్ చైర్మన్ మందడి సైదిరెడ్డి రెడ్డి, వైస్ చైర్మన్ అబ్బగోని రమేశ్ గౌడ్ తదితరులు పాల్గొన్నారు.
