- కందకుర్తిలో రూ.12 కోట్లతో స్పీడ్గా పనులు
- ఆర్ఎస్ఎస్ ఫౌండర్ హెడ్గేవార్ చిన్నప్పటి ఇంటి స్థలంలో నిర్మాణాలు
- నేడు హర్యానా గవర్నర్ దత్తాత్రేయ రాక
నిజామాబాద్, వెలుగు:ఇందూర్ జిల్లాలోని రెంజల్ మండలం కందకుర్తి విలేజ్లో ఆర్ఎస్ఎస్ వ్యవస్థాపకుడు హెడ్గేవార్ చిన్నప్పుడు గడిపిన ఇంటిని స్మృతి మందిరంగా మార్చే పనులు వేగంగా నడుస్తున్నాయి. సంఘ్ పరివార్ ఏర్పడి వందేండ్లు కావస్తున్న నేపథ్యంలో చరిత్రలో నిలిచిపోయేలా భారీ నిర్మాణాలు చేపట్టారు. తెలంగాణ రాష్ట్రంలో గోదావరి నది ప్రవేశించే ఈ చిన్నగ్రామానికి జాతీయ స్థాయి గుర్తింపు తెచ్చేలా సంఘ్ నిర్ణయాలు తీసుకుంది. హర్యానా గవర్నర్ బండారు దత్తాత్రేయ ఆదివారం కందకుర్తిని విజిట్ చేయడానికి వస్తున్నందున కోలాహలమైన వాతావరణం నెలకొంది.
దసరా రోజున సంఘ్ ఆవిర్భావం
కేశవ్ బలిరాం హెడ్గేవార్ పూర్వీకులు కందకుర్తిలో గడిపారు. ఇక్కడి చారిత్రక రాం మందిరం అర్చకులకు హెడ్గేవార్ తాత, ముత్తాతలు కులగురువులుగా వ్యవహరించేవారు. ఈ టెంపుల్ వ్యవహారాలను డాక్టర్ వృత్తిలో స్థిరపడిన ఆయన తాత నాగ్పూర్ నుంచి పర్యవేక్షించేవారు. బళీరాం ఇద్దరు కుమారులలో చిన్నవాడైన హెడ్గేవార్1889 ఏప్రిల్1న ఇక్కడే పుట్టి పెరిగి ఉన్నత చదువుల కోసం నాగ్పూర్ వెళ్లారు. తాత వారసత్వంగా డాక్టర్గా శిక్షణ పొంది 'అనుశీలన సమితి' పేరుతో గల ఒక విప్లవ సంస్థతో కొన్నాళ్లు అనుబంధం కొనసాగించారు.
తరువాత హిందూజాతిని ఒక వేదికపై తేవడంతో పాటు వారిలో ఐక్యత, క్రమశిక్షణ, దేశభక్తి లక్ష్యంగా నాగ్పూర్ కేంద్రంగా 1925లో సరిగ్గా దసరా పండగ రోజు రాష్ట్రీయ స్వయం సేవక్ సంఘ్ (ఆర్ఎస్ఎస్) స్థాపించారు. వంద మందితో మొదలైన సంఘ్ తన భావజాలవ్యాప్తితో ఇప్పుడు కోట్లాది మంది సభ్యులతో దేశ రాజకీయాలను పరోక్షంగా శాసించే స్థాయికి చేరింది. బ్రహ్మచారిగా జీవితం గడిపిన హెడ్గేవార్ 1940లో మృతి చెందాక ఆయన బాల్యం గడిచిన ఇంటిని సంఘ్ పరివార్ స్మృతివనంగా మార్చారు.
హెడ్గేవార్ విగ్రహంతో పాటు వారి కుటుంబీకుల కులదైవమైన చెన్నకేశవనాథ్ విగ్రహాన్ని, భరతమాత విగ్రహాన్ని అందులో ప్రతిష్టించారు. తరువాత1989 నుంచి శ్రీ కేశవ శిశు సమితి పేరుతో ప్రైమరీ పాఠశాల నడుపుతూ పేద పిల్లలకు విద్యాబుద్ధులు అందిస్తున్నారు. కంప్యూటర్ డిజిటల్ ల్యాబ్, ఈ-క్లాస్లు, ఎల్ఈడీ టీవీ సౌకర్యాన్ని ఇందులో కల్పించారు. శిశు సమితి స్కూల్లో టీచర్లందరికీ స్పోకెన్ ఇంగ్లీష్లో స్పెషల్ శిక్షణ ఇవ్వడం మరో ప్రత్యేకత.
ప్రధాని మోడీతో ఓపెనింగ్
1925లో స్థాపించిన ఆర్ఎస్ఎస్ వందేండ్లు చేరుకుంటున్న సందర్భంగా హెడ్గేవార్ స్మృతి మందిరాన్ని భారీగా విస్తరించాలని నిర్ణయించిన పరివార్ రూ.కోట్ల ఖర్చుతో ఏడాది కింద పనులు మొదలుపెట్టింది. మొత్తం పదెకరాల భూమిని సేకరించి కేశవ స్మృతి సెంటర్, స్కూల్, హాస్టల్, భరతమాత టెంపుల్, పేద యువకులు, మహిళలు, రైతులకు ట్రైనింగ్ ఇచ్చేలా భవనాలు నిర్మించనున్నారు.
రూ.12 కోట్లతో షురూ చేసిన పనులను ఖర్చుకు వెనుకాడకుండా వచ్చే ఉగాది నాటికి పూర్తి చేసే టార్గెట్తో ముందుకు వెళ్తున్నారు. హెడ్గేవార్ను అన్ని తరాలు స్మరించుకునేలా, దేశవ్యాప్త గుర్తింపువచ్చేలా నిర్మాణ పనులు కొనసాగుతున్నాయి. ప్రధాని మోడీ చేతుల మీదుగా దీని ఓపెనింగ్ చేయించాలని ఇప్పటికే నిర్ణయించారు.
అద్వానీ, వెంకయ్య నాయుడు సందర్శన
తమ ఆరాధ్యదైవం హెడ్గేవార్ పుట్టిపెరిగిన కందకుర్తి విలేజ్ను చూడడానికి 1993లో భారత ఉప రాష్ట్రపతి వెంకయ్యనాయుడు, మాజీ ఉప ప్రధాని ఎల్కే అద్వానీ కలిసి వచ్చారు. స్మృతిమందిరాన్ని విజిట్ చేశారు. ప్రకృతిపరంగా కందకుర్తికి మరో విశిష్టత ఉంది. గోదావరి, మంజీరా, హరిద్రా మూడు నదులు ఇక్కడే ఒక చోట కలువడంతో త్రివేణి సంగమంగా పేరు పొందింది.
తెలంగాణలోకి గోదావరి ఎంటర్ అయ్యేది కందకుర్తి వద్దే. ఏటా శ్రావణమాసంలో గంగమ్మకు హారతి ఇస్తారు. అత్యంత నిష్టతో చేపట్టే ఈ ప్రోగ్రాంలో పాల్గొనడానికి హర్యానా గవర్నర్ బండారు దత్తాత్రేయ ఆదివారం వస్తున్నారు. హెడ్గేవార్ స్మృతిమందిరం పనులు ఆయన పరిశీలించనున్నందున సంఘ్ పరివార్ సందడి చేస్తోంది. 2003, 2015లో జరిగిన గోదావరి పుష్కరాలకు లక్షలాది మంది భక్తులు కందకుర్తి వచ్చారు. విలేజ్ను టూరిజం కింద డెవలప్ చేయాలనే ప్రతిపాదన చాలా ఏండ్లుగా ఉంది.
