ఖమ్మం రూరల్, కూసుమంచి, వెలుగు : పాలేరులో కొంతమంది బందిపోటు దొంగలు తిరుగుతున్నారని, వారి పట్ల ప్రజలు జాగ్రత్తగా ఉండాలని పాలేరు బీఆర్ఎస్ అభ్యర్థి, ఎమ్మెల్యే కందాల ఉపేదర్రెడ్డి అన్నారు. తాను ఏ కాంట్రాక్టర్ దగ్గర 30శాతం కమీషన్ తీసుకున్నానో దమ్ముంటే నిరూపించాలని సవాల్ విసిరారు. శుక్రవారం ఖమ్మం రూరల్ మండలంలో పల్లెగూడెం, పోలేపల్లి గ్రామాల్లో నిర్వహించిన ఎన్నికల ప్రచారం ఆయన మాట్లాడారు.
తనపై ఛార్జ్ షీట్ అంటూ పిచ్చి రాతలు రాస్తున్నారని మండిపడ్డారు. గతంలో ఒకాయన ఎంపీ, మరోకాయన మంత్రిగా పనిచేసి పల్లెగూడెం, -మంగళగూడెం రోడ్డు వేయించారా అని ప్రశ్నించారు. వీళ్లు చెప్పే మాటలు వినడానికి పాలేరు ప్రజలు అమాయకులు కాదన్నారు. ఎవ్వరు దొంగో, ఎవ్వరు మంచివారో 3న తేలుతుందన్నారు. గత ఎన్నికల్లో కూడా జంగాల సోదరులు తన వెంటనే ఉన్నారని, ఈ ఎన్నికల్లో కూడా తనవెంటే ఉంటారని తెలిపారు. కార్యక్రమంలో ఎంపీ నామా నాగేశ్వరరావు, ఎమ్మెల్సీ తాత మధుసూదన్, పాలేరు నియోజకవర్గ ఎన్నిక సమన్వయకర్త మాజీ ఎమ్మెల్యే బాణోత్ చంద్రావతి, బీఆర్ఎస్ నాయకులు తాళ్లూరి జీవన్ కుమార్ తదితరులు పాల్గొన్నారు.
బీఆర్ఎస్లో చేరికలు
కూసుమంచి మండలంలో బోడియాతండా జీపీలోని బండమీది తండాకు చెందిన 40 కుటుంబాలు, తిరుమలాయపాలెం మండలంలో కాకరవాయి,చంద్రు తండా, హస్నాబాద్ గ్రామాలకు చెందిన 32 కుటుంబాలు శుక్రవారం కందాల ఉపేందర్రెడ్డి సమక్షంలో బీఆర్ఎస్ లో చేరాయి. కూసుమంచి మండలంలో మల్లాయిగూడెం, హట్యాతండా, రాజుతండాల్లో ఎమ్మెల్యే సతీమణి విజయమ్మ ఇంటింటి ప్రచారం నిర్వహించారు. కార్యక్రమంలో డీసీసీబీ డైరెక్టర్ ఇంటూరి శేఖర్, సర్పంచ్ వెంకట్, ఎంపీటీసీ పాల్గొన్నారు.
