థియేటర్కి వెళ్లి సినిమా చూడక చానాళ్లు అయింది. నెట్ఫ్లిక్స్, అమేజాన్ ప్రైమ్ సర్వీసులు వచ్చాక మూవీ మహల్స్ని మర్చిపోయాను. అయితే, మంచి తెలుగు సినిమాలను మాత్రం మిస్ కావట్లేదు. వాటిని ఆన్లైన్లో రెగ్యులర్గా చూస్తున్నా. ఈ మధ్య కాలంలో నాకు బాగా నచ్చిన చిత్రం ‘కేరాఫ్ కంచరపాలెం’. రీసెంట్గా ‘మల్లేశం’. నిజం చెప్పాలంటే ‘కేరాఫ్ కంచరపాలెం’ కన్నా ‘మల్లేశం’ సినిమాకే నేను నాలుగు మార్కులు ఎక్కువ వేస్తా. స్టోరీని నమ్ముకొని, దాన్ని అందరి మనసులకూ హత్తుకునేలా తీసిన సినిమా ఇది. ఇందులో ఏమాత్రం అతిశయోక్తి లేదు.
బయోపిక్లు తీయటం ఒక రకంగా రిస్క్తో కూడిన ప్రయత్నమనే చెప్పాలి. ఎక్స్పర్మెంట్గా భావించి తెరకెక్కించే మూవీల్లో స్పెషల్ ఎఫెక్ట్లకు పెద్దగా స్కోప్ ఉండదు. క్రియేటివిటీ ప్రదర్శించటానికీ వీలు పడదు. అందువల్ల అవి డాక్యుమెంటరీలుగా మిగిలిపోతాయి. బడ్జెట్పరంగా నష్టాలు మూటగట్టుకోవాల్సి వస్తుంది. ‘కేరాఫ్ కంచరపాలెం’ను ధైర్యంగా తీశారు. అది ఒక మంచి ప్రయత్నం. కానీ.. ప్రొడక్షన్ క్వాలిటీ పరంగా (ముఖ్యంగా ఆడియో విషయంలో) ఇంకొన్ని జాగ్రత్తలు తీసుకొని ఉంటే బాగుండేది. ‘మల్లేశం’లో ఇలాంటి మైనస్ పాయింట్లు రిపీట్ కాకుండా చక్కగా డీల్ చేశారు. ఈ సినిమాలో దాదాపు అన్ని విభాగాలూ తమ మార్క్ చూపించాయి. సినిమా నిర్మాణంలో ఎక్కడా రాజీపడలేదు.
తెలంగాణ యాస ప్రతి మాటలో వినిపిస్తుంది. అన్ని క్యారక్టర్లూ సింపుల్గా, నేచురల్గా అనిపిస్తాయి. యాక్టర్లంతా తమ పాత్రల్లో జీవించారు. ఝాన్సీ రోల్ చాలా రియలిస్టిక్గా ఉంది. తెలంగాణలోని రూరల్ ఏరియాల్లో లైఫ్ ఎలా ఉంటుందో ఈ సినిమాలో అచ్చుగుద్దినట్లు చూపించారు. ప్రజల అమాయకత్వానికి, కట్టూ బొట్టుకి అద్దం పట్టారు. ప్రతి సీనూ ప్రతి ప్రేక్షకుణ్ని కదిలించేలా ఉంటుంది. మ్యూజిక్, సినిమాటోగ్రఫీ, డైలాగ్స్ ఆకట్టుకుంటాయి. ‘మల్లేశం’ సినిమా డైరెక్టర్, ప్రొడ్యూసర్ గురించి ఎంత చెప్పినా తక్కువే. వాళ్ల కష్టానికి ఫలితం దక్కింది. ఇక్కడ ముఖ్యంగా గమనించాల్సిన విషయం ఏంటంటే.. తెలంగాణ డైరెక్టర్లు ఇటీవల తమ టాలెంట్ని నిరూపించుకుంటున్నారు. ‘మల్లేశం’ను చూట్టానికి జనం పెద్దగా రావట్లేదనే సాకుతో దీని గురించి తక్కువ చేసి మాట్లాడకూడదు. మంచి సినిమాకి ప్రేక్షకుల సంఖ్య కొలమానం కాదు. ‘మల్లేశం’ మూవీకి సరైన రెస్పాన్స్ రాకపోతే అది ఫిల్మగోయెర్స్ టేస్ట్లో లోపమే.
– కందుల రమేశ్, సీనియర్ జర్నలిస్ట్
