కన్నడ సీరియల్​ నటి.. శోభిత శివన్న ఆత్మహత్య

• ఇంట్లో ఫ్యాన్‌‌‌‌‌‌‌‌కుఉరివేసుకొని సూసైడ్​

గచ్చిబౌలి, వెలుగు: కన్నడ సీరియల్​నటి శోభిత శివన్న సూసైడ్‌‌‌‌‌‌‌‌ చేసుకున్నారు. ఆదివారం హైదరాబాద్‌‌‌‌‌‌‌‌ కొండాపూర్‌‌‌‌‌‌‌‌‌‌‌‌‌‌‌‌ శ్రీరాంనగర్‌‌‌‌‌‌‌‌‌‌‌‌‌‌‌‌లోని తన ఇంట్లో ఉరేసుకొని ఆత్మహత్యకు పాల్పడ్డారు. సమాచారం అందుకున్న పోలీసులు ఘటనా స్థలానికి చేరుకొని, మృతదేహాన్ని పోస్ట్‌‌‌‌‌‌‌‌మార్టం కోసం ఉస్మానియా హాస్పిటల్‌‌‌‌‌‌‌‌కు తరలించారు. కర్నాటకలోని హసన్ జిల్లా సక్లేశ్‌‌‌‌‌‌‌‌పూర్‌‌‌‌‌‌‌‌‌‌‌‌‌‌‌‌కు చెందిన శోభిత(32) కన్నడలో పాపులర్ సీరియల్స్‌‌‌‌‌‌‌‌తో పాటు ​పలు సినిమాల్లో నటించింది.పెండ్లి తర్వాత యాక్టింగ్‌‌‌‌‌‌‌‌కు గుడ్ బై చెప్పిన శోభిత.. కొండాపూర్ శ్రీరాంనగర్‌‌‌‌‌‌‌‌‌‌‌‌‌‌‌‌లో తన భర్తతో కలిసి ఉంటోంది. 

పెళ్లయిన ఏడాదికే.. 

హైదరాబాద్ తుక్కుగూడకు చెందిన సుధీర్ రెడ్డి బెంగళూరులో సాఫ్ట్‌‌‌‌‌‌‌‌వేర్ జాబ్ చేస్తున్నాడు. ఓ మ్యాట్రిమోనీ వెబ్‌‌‌‌‌‌‌‌సైట్‌‌‌‌‌‌‌‌లో శోభితతో సుధీర్ రెడ్డికి పరిచయం ఏర్పడింది. అది కాస్త ప్రేమగా మారింది. పెద్దలను ఒప్పించి 2023 మే 21న వారు పెండ్లి చేసుకున్నారు. తర్వాత ఇద్దరూ కలిసి హైదరాబాద్‌‌‌‌‌‌‌‌కు వచ్చి కొండాపూర్ శ్రీరాంనగర్‌‌‌‌‌‌‌‌‌‌‌‌‌‌‌‌లో ఉంటున్నారు. సుధీర్ రెడ్డి హైటెక్ సిటీలో సాఫ్ట్‌‌‌‌‌‌‌‌వేర్ జాబ్​చేస్తున్నాడు. ఇటీవల తెలుగు సీరియల్స్‌‌‌‌‌‌‌‌తో పాటు సినిమాల్లో అవకాశాల కోసం శోభిత ప్రయత్నాలు చేస్తోంది. శనివారం రాత్రి 10 గంటల సమయంలో భర్తతో కలిసి భోజనం చేసిన శోభిత.. తన బెడ్ రూంలోకి వెళ్లి నిద్రపోయింది. మరో బెడ్‌‌‌‌‌‌‌‌ రూంలో సుధీర్​రెడ్డి తన ఆఫీస్‌‌‌‌‌‌‌‌ వర్క్ చేసుకుంటూ అందులోనే నిద్రపోయాడు. ఆదివారం ఉదయం 8 గంటల సమయంలో పనిమనిషి వచ్చి శోభిత బెడ్ రూం డోర్​కొట్టగా, ఆమె ఓపెన్​ చేయలేదు. దీంతో సుధీర్ రెడ్డి డోర్ పగులగొట్టి లోపలికి వెళ్లి చూడగా, శోభిత ఫ్యాన్‌‌‌‌‌‌‌‌కు వేలాడుతూ కనిపించింది. సమాచారం అందుకున్న పోలీసులు ఘటన స్థలానికి చేరుకొని శోభిత మృతదేహాన్ని పోస్టుమార్టం కోసం ఉస్మానియా దవాఖానకు తరలించారు.