కన్నడ స్టార్ హీరో రిషబ్ శెట్టి నటిస్తూ రూపొందిస్తున్న కాంతార చాప్టర్ 1 షూటింగ్ శరవేగంగా జరుగుతోంది. తాజాగా కాంతార చాప్టర్ 1లో నటిస్తున్న ఆర్టిస్టుల బస్సు ప్రమాదానికి గురైంది. కర్ణాటక ఉడిపి జిల్లా జడ్కల్ సమీపంలో బోల్తా పడిన బస్సులో 20 మంది ఉన్నట్లు సమాచారం.
ఈ ప్రమాదంలో ఆరుగురికి తీవ్ర గాయాలయ్యాయి. క్షతగాత్రులను తట్కా జడ్కల్, కుందాపూర్ ఆసుపత్రులకు తరలించి చికిత్స అందిస్తున్నారు. కొల్లూరు పోలీసులు కేసు దర్యాప్తు చేస్తున్నారు. కాగా ముదూరులో షూటింగ్ ముగించుకుని కొల్లూరుకు తిరిగి వస్తుండగా ఈ ఘటన చోటు చేసుకుంది.
ఇక ఈ సంఘటనకు సంబంధించి పూర్తి సమాచారం తెలియాల్సి ఉంది. ఈ సినిమాని హోంబలే ఫిల్మ్స్ నిర్మిస్తుండగా రిషబ్ శెట్టి దర్శకత్వం వహిస్తున్నాడు.
