‘కేజీయఫ్‌’ సిరీస్‌‌తో ప్యాన్‌ ఇండియా స్థాయిలో మెప్పించిన హోంబలే సంస్థ నుండి వస్తున్న మరో యాక్షన్ థ్రిల్లర్ ‘కాంతారా’. రిషబ్ శెట్టి హీరోగా నటిస్తూ డైరెక్ట్ చేశాడు. ఇటీవల కన్నడలో విడుదలై సక్సెస్‌ టాక్‌ తెచ్చుకున్న ఈ మూవీ అక్టోబర్ 15న తెలుగులోకి వస్తోంది. గీతా ఫిల్మ్ డిస్ట్రిబ్యూషన్ సంస్థ ద్వారా అల్లు అరవింద్ తెలుగు రాష్ట్రాల్లో విడుదల చేస్తున్నారు.
ఈ సందర్భంగా ఏర్పాటుచేసిన ప్రెస్ మీట్‌‌లో రిషబ్ మాట్లాడుతూ.. ‘కాంతారా అంటే మిస్టీరియస్‌ ఫారెస్ట్ అని అర్థం. అగ్రికల్చర్, కల్చర్, దైవ నమ్మకాల చుట్టూ తిరిగే ఈ యూనివర్సల్ కాన్సెప్ట్‌ ప్రేక్షకుల్ని కొత్త ప్రపంచంలోకి తీసుకెళ్తుంది. గతంలో నేను నటించిన ‘బెల్ బాటమ్’ సినిమా డబ్బింగ్ వెర్షన్ అల్లు అరవింద్ గారి ‘ఆహా’లో విడుదలైంది. ఈ సినిమాని ఆయన థియేటర్స్‌‌లో విడుదల చేస్తుండటం హ్యాపీ. తెలుగువారికి కచ్చితంగా నచ్చుతుందని ఆశిస్తున్నా’ అన్నాడు.
అల్లు అరవింద్ మాట్లాడుతూ.. ‘మంచి కథలు ఎంచుకోవడం నుంచి అద్భుతంగా తీయడం వరకు హోంబలే సంస్థను చూసి నేనూ కొంత నేర్చుకోవాలనిపిస్తోంది. ముఖ్యంగా ఈ మూవీ చూశాక. డిఫరెంట్‌ ఎక్స్‌‌పీరియెన్స్‌‌నిచ్చే చిత్రమిది. ఫారెస్ట్ బ్యాక్‌‌డ్రాప్‌‌లో తీయడంతో పాటు విష్ణుతత్వాన్ని కూడా చెప్పారు. యాక్షన్, డివోషనల్‌ సీన్స్‌‌లో రిషబ్ అద్బుతంగా నటించాడు. చివరి నలభై నిముషాలూ చూపు తిప్పుకోనివ్వడు. నేను చాలా ఎంజాయ్ చేశాను. ప్రేక్షకులకి కూడా కచ్చితంగా నచ్చుతుంది’ అన్నారు. హీరోయిన్ సప్తమి గౌడ, లిరిసిస్ట్‌ రాంబాబు గోశాల తదితరులు పాల్గొన్నారు.
