- ఇరిగేషన్ లెటర్తో సర్వే చేపట్టిన ఎన్హెచ్ ఇంజినీర్లు
భద్రాచలం, వెలుగు : భద్రాచలంలోని కూనవరం రోడ్డులో అసంపూర్తిగా మిగిలిన కరకట్ట నిర్మాణం పనులకు ప్రభుత్వం రూ.38.45కోట్లు మంజూరు చేసింది. పనులను శ్రీహర్ష కనస్ట్రక్షన్స్ చేజిక్కించుకుంది.
అయితే ఈ కరకట్ట విజయవాడ-జగదల్పూర్ జాతీయ రహదారి మీదుగా చేపట్టాల్సి ఉంది. దీంతో నేషనల్ హైవే అనుమతి కోసం భద్రాచలం ఇరిగేషన్ శాఖ లేఖ రాసింది. ఈ క్రమంలో శనివారం బెంగళూరుకు చెందిన సాత్విక్ ఇంజినీరింగ్ కన్సల్టెన్సీ(ఎస్ఈసీ)తో ఎన్హెచ్ ఇంజినీర్లు సర్వే ప్రారంభించారు.
హైవేపై 40 అడుగుల మట్టికట్ట
700 మీటర్ల మేర నిర్మించే గోదావరి కరకట్ట సరస్వతీ శిశుమందిర్ స్కూల్ దాటాక హైవేను క్రాస్చేస్తోంది. ఎస్ఈసీ కన్సల్టెన్సీ చేపట్టిన సర్వే ప్రకారం హైవేపై 40 అడుగుల మేర కరకట్ట కట్టాల్సి ఉంది. ఇటువంటి సమయంలో హైవేను ఈ కట్ట మీదుగా తీసుకెళ్లాలి. ఇక్కడ ఫ్లైఓవర్ కట్టాలా? లేక రోడ్డునే నిర్మించాలా..? అనేది హైవేస్ ఇంజనీర్లు డిజైన్ చేయాలంటే ఈ సర్వే నివేదిక తప్పనిసరి.
అయితే కట్టను దాటే సమయంలో హైవే పెద్ద మలుపు వచ్చింది. దీంతో రోడ్డను స్ట్రైట్గా తీసుకెళ్లాలంటే మళ్లీ భూసేకరణ చేయాల్సి వస్తుంది. ఇప్పటికే ఈ కరకట్ట నిర్మాణానికి 33 ఎకరాల రైతుల భూములను ప్రభుత్వం సేకరించింది. ప్రస్తుత సర్వే ప్రకారం రోడ్డు డిజైన్ మార్చాల్సి వస్తే తప్పనిసరిగా పక్కనే ఉన్న రైతుల నుంచి మరికొంత భూమిని సేకరించాల్సి ఉంటుంది.
దీనికి సంబంధించి నేషనల్ హైవేస్ కరకట్ట నిర్మాణానికి గ్రీన్సిగ్నల్ ఇవ్వాలంటే వారు సూచించిన డిజైన్ ప్రకారం రోడ్డు నిర్మాణం చేపట్టాల్సిందే. ఈ నేపథ్యంలో ఎన్హెచ్ చేయిస్తున్న సర్వే కరకట్ట నిర్మాణం కీలకం కానుంది. ఈ సర్వే రెండు రోజులపాటు కొనసాగనుంది.
