కరీంనగర్ క్రైం, వెలుగు: కరీంనగర్ కలెక్టర్ గోపి ఇంట్లో చోరీ జరిగింది. ఆయనకు సంబంధించిన కొన్ని కీలక డాక్యుమెంట్లు, ఎలక్ట్రానిక్ వస్తువులను గుర్తు తెలియని వ్యక్తి ఎత్తుకెళ్లినట్లు పోలీసులు తెలిపారు. ఈ ఘటన పోయిన నెల 30వ తేదీ తెల్లవారుజామున జరగ్గా.. ఆలస్యంగా వెలుగులోకి వచ్చింది. ఎన్నికల సంఘం తీసుకున్న చర్యల్లో భాగంగా కరీంనగర్ కలెక్టర్గా పని చేస్తున్న గోపి బదిలీ అయ్యారు. అక్టోబర్ 30న హైదరాబాద్లో రిపోర్ట్ చేయాల్సి ఉంది.
ముందు రోజు రాత్రి తనకు సంబంధించిన ల్యాప్టాప్, డిజిటల్ కీ, పెన్ డ్రైవ్, పాస్ఫొటోలు, బ్యాగుతో పాటు ఒరిజినల్ సర్టిఫికెట్లు సర్దుకుని హాల్లో పెట్టారు. తర్వాత ఆయన బెడ్ రూమ్లోకి వెళ్లి పడుకున్నారు. అదే రోజు తెల్లవారుజామున క్యాంప్ ఆఫీస్ వెనుక వైపు నుంచి గోడ దూకి లోపలికి వచ్చిన దుండగుడు.. హాల్లో ఉన్న వస్తువులన్నీ ఎత్తుకెళ్లాడు.
కలెక్టర్ క్యాంప్ సూపరింటెండెంట్ రామ్మోహన్ ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. క్యాంప్ ఆఫీస్లోని సీసీ టీవీ ఫుటేజీ పరిశీలించారు. ఓ వ్యక్తి గోడ దూకి ఇంట్లోకి వచ్చి.. డాక్యుమెంట్లు, ఎలక్ట్రానిక్ వస్తువులు ఎత్తుకెళ్లినట్లు రికార్డైంది. నిందితుడికి సంబంధించిన ఫొటో రిలీజ్ చేశామని, అతన్ని పట్టుకునేందుకు ప్రయత్నిస్తున్నామని వన్టౌన్ ఇన్స్పెక్టర్ రవి తెలిపారు.
