వాషింగ్టన్: అమెరికా ప్రెసిడెంట్ డొనాల్డ్ ట్రంప్ సలహాదారు ఎలాన్ మస్క్ ఇచ్చిన జస్టిఫై యువర్ జాబ్ ఆదేశాలను పట్టించుకోవద్దని ఆ దేశ ఫెడరల్ బ్యూరో ఆఫ్ ఇన్వెస్టిగేషన్ డైరెక్టర్ కాష్ పటేల్ తన ఉద్యోగులకు సూచించారు. ఎఫ్బీఐకి సొంత విధానాలున్నాయని, ఆ ప్రకారంగానే తన ఉద్యోగుల పనితీరును పరిశీలిస్తుందని పేర్కొన్నారు.
‘సమాచారం కోరుతూ ఆఫీస్ ఆఫ్ పర్సనల్ మేనేజ్మెంట్(ఓపీఎం)నుంచి ఎఫ్బీఐ సిబ్బందికి వచ్చిన మెయిల్గురించి పట్టించుకోవద్దు. ఎఫ్బీఐ రూల్స్కు అనుగుణంగా డైరెక్టర్ కార్యాలయం సమీక్షలు నిర్వహిస్తుంది. బాధ్యత వహిస్తుంది. మీ నుంచి మరింత సమాచారం అవసరమైతే ఎఫ్బీఐనే కోరుతుంది. ఇతరుల ఆదేశాలను నిలిపివేయండి” అని కాష్ పటేల్ ఎఫ్బీఐ ఉద్యోగులందరికీ ఆదివారం మెయిల్ చేశారు.
కాగా, ప్రభుత్వ ఖర్చులను తగ్గించేందుకు దూకుడుగా వ్యవహరిస్తున్న మస్క్.. ఎఫ్బీఐ ఉద్యోగులందరికీ శనివారం ఓ అల్టిమేటం జారీ చేశారు. ఉద్యోగులంతా గతవారం చేసిన పనేంటో 5 వాక్యాల్లో వివరించాలని సూచించారు. సోమవారం అర్ధరాత్రిలోగా రిప్లయ్ ఇవ్వనివాళ్లను రాజీనామా చేసినట్లుగా పరిగణిస్తామని ఓపీఎం నుంచి మెయిల్ పంపారు. ఓపీఎం నుంచి వచ్చిన ఈ మెయిల్కు రెస్పాండ్ కావొద్దని కాష్ పటేల్ సూచించారు.
