కరాచీ: భారత్-పాకిస్థాన్ ద్వైపాక్షిక సంబంధాల పునరుద్ధరణలో అడ్డుగా ఉన్న ఒకే అంశం కశ్మీర్ అని పాక్ ప్రధాని ఇమ్రాన్ ఖాన్ అన్నారు. కశ్మీర్ అంశాన్ని పరిష్కరించడం ద్వారా ఇరు దేశాల స్నేహసంబంధాల పునరుద్ధరణలో భారత్ తొలి అడుగు వేయాలని ఇమ్రాన్ సూచించారు. ‘భారత్-పాక్ సంబంధాల పునరుద్ధరణ కోసం మేం శాయశక్తులా యత్నిస్తున్నాం. కానీ ఈ దిశగా ఇండియా తొలి అడుగు వేయాలి. ఆగస్టు 5 తర్వాత భారత్ ఈ దిశగా చర్యలు చేపట్టాలి. అప్పుడే మేం కూడా ముందుకు రాగలం. మాకు కశ్మీర్ విషయంలోనే సమస్య ఉంది. చర్చల ద్వారా దీన్ని పరిష్కరించుకోవచ్చు’ అని ఇమ్రాన్ అన్నారు. 2019, ఆగస్టు 5న జమ్మూ కశ్మీర్‌‌కు ఉన్న ప్రత్యేక ప్రతిపత్తిని కేంద్రం తొలగించిన నేపథ్యంలో ఇమ్రాన్ ఆ తేదీ ప్రస్తావన తీసుకొచ్చారు.
