- రూ.150 కోట్లతో కామారెడ్డి మెనిఫెస్టో ప్రకటించిన వెంకట రమణారెడ్డి
- సొంత నిధులతో అభివృద్ధి పనులు
కామారెడ్డి, వెలుగు: కామారెడ్డి నుంచి బీజేపీ టికెట్ఆశిస్తున్న కాటిపల్లి వెంకటరమణారెడ్డి ‘నేను సైతం కామారెడ్డి కోసం’ పేరుతో రూ.150 కోట్ల సొంత నిధులతో నియోజకవర్గంలో అభివృద్ధి పనులు చేపట్టనున్నట్లు ప్రకటించారు. శనివారం జిల్లా కేంద్రంలో బీజేపీ పార్టీ ఆఫీస్లో మెనిఫెస్టోను రిలీజ్చేశారు. ఈ సందర్భంగా రమణారెడ్డి ఉచిత విద్య, వైద్యం, రైతు సేవా కేంద్రాలు, ప్రతి గ్రామంలో రైతు కల్లాల నిర్మాణం, ఉచిత ఉపాధి శిక్షణా కేంద్రాలు ఏర్పాటు చేయనున్నట్లు చెప్పారు. తన తండ్రి కేపీ రాజిరెడ్డి జన సేవా ట్రస్ట్ ఆధ్వర్యంలో ఈ పనులు చేపట్టనున్నట్లు తెలిపారు. ఎన్నికల్లో గెలుపోటములతో సంబంధం లేకుండా ఈ పనులు కొనసాగుతాయన్నారు.
కామారెడ్డిలో 2 ఎకరాల్లో మల్టీ సూపర్ స్పెషాలిటీ హాస్పిటల్ నిర్మాణం, కార్పొరేట్ స్థాయిలో వైద్య సేవలు, ప్రతి మండల కేంద్రంలో ఒక జనరల్హాస్పిటల్, డయాగ్నోస్టిక్ సెంటర్ను నిర్మిస్తామన్నారు. వారానికోసారి స్పెషలిస్టులతో హెల్త్క్యాంప్లు నిర్వహిస్తామని చెప్పారు. అంబులెన్సులు కూడా అందుబాటులో ఉంచుతామన్నారు. నియోజకవర్గ కేంద్రంతో పాటు, మండల కేంద్రాల్లో మోడల్ స్కూళ్లను కట్టిస్తామన్నారు. యువతకు ఉపాధి అవకాశాలు మెరుపు పరిచేందుకు ప్రతి మండలకేంద్రంలో నైపుణ్య శిక్షణ కేంద్రాలు ఏర్పాటు చేస్తామన్నారు. రైతు సేవా కేంద్రాలు ఏర్పాటు చేసి పంటల సాగుపై శిక్షణనిస్తామన్నారు. ప్రతి గ్రామంలో రైతు కల్లాలు కట్టిస్తామన్నారు.
