- రాత్రి 8 గంటల తర్వాత రోడ్‌ షో
హైదరాబాద్, వెలుగు: మాజీ సీఎం, బీఆర్ఎస్ ప్రెసిడెంట్ కేసీఆర్ బస్సు యాత్ర శుక్రవారం రాత్రి తిరిగి ప్రారంభం కానుంది. ఎలక్షన్ కమిషన్ కేసీఆర్‌‌‌‌పై విధించిన 48 గంటల బ్యాన్ శుక్రవారం రాత్రి 8 గంటలకు ముగియనుంది. అదే రోజు రాత్రి రామగుండంలో జరగనున్న రోడ్‌ షోలో ఆయన పాల్గొంటారని పార్టీ ప్రకటించింది. కాంగ్రెస్‌ నేతలపై అభ్యంతరకర వ్యాఖ్యలు చేయడంతో కేసీఆర్ ప్రచారంపై ఈసీ బ్యాన్ విధించింది.
దీంతో బుధవారం రాత్రి మహబూబాబాద్‌ రోడ్‌ షో ముగించుకుని, నేరుగా ఎర్రవెల్లిలోని ఫామ్‌‌హౌస్‌‌కు వెళ్లిపోయారు. గురువారం ఆయన అక్కడే ఉన్నారు. శుక్రవారం సాయంత్రం రామగుండం వెళ్లి, బస్సు యాత్ర రీస్టార్ట్ చేసి, రాత్రికి అక్కడే బస చేయనున్నారు. శనివారం జగిత్యాల జిల్లాలో రోడ్‌ షోలో పాల్గొంటారు. ఈసీ బ్యాన్‌‌తో జమ్మికుంట, వీణవంకలో గురువారం చేపట్టాల్సిన రోడ్‌ షోలు రద్దయ్యాయి. మిగతా షెడ్యూల్‌ యథావిధిగా కొనసాగుతుందని బీఆర్ఎస్ వర్గాలు వెల్లడించాయి.
