హైదరాబాద్/ ములుగు, వెలుగు: బీఆర్‌‌‌‌‌‌‌‌ఎస్‌ ఎమ్మెల్యేలు, నాయకులతో ఆ పార్టీ అధినేత కేసీఆర్ వరుసగా రెండోరోజూ భేటీ అయ్యారు. ఎర్రవల్లిలోని తన ఫామ్ హౌజ్లో ఎమ్మెల్యేలు, మాజీ ఎమ్మెల్యేలు, ఇతర నాయకులతో సమావేశం నిర్వహించారు. ఈ సమావేశంలో ఎమ్మెల్యేలు హరీశ్రావు, ప్రశాంత్ రెడ్డి, పల్లా రాజేశ్వర్ రెడ్డి, కాలేరు వెంకటేశ్‌, బండారి లక్ష్మారెడ్డి, మర్రి రాజశేఖర్‌‌‌‌‌‌‌‌రెడ్డి, మల్లారెడ్డి, సుధీర్ రెడ్డి, సునీతా లక్ష్మారెడ్డి, ఎమ్మెల్సీ తాతా మధు, మాజీ ఎమ్మెల్యేలు సింగిరెడ్డి నిరంజన్ రెడ్డి, జీవన్ రెడ్డి, రసమయి బాలకిషన్, సుంకె రవిశంకర్, పార్టీ నేతలు రాగిడి లక్ష్మారెడ్డి, సుధీర్ బాబు, పల్లె రవి గౌడ్, రజినీ సాయిచంద్ తదితరులు పాల్గొన్నారు.
పార్టీ ఫిరాయింపులు, భవిష్యత్ కార్యాచరణపై సమావేశంలో చర్చించినట్టు తెలిసింది. ఉప్పల్ ఎమ్మెల్యే బండారి లక్ష్మారెడ్డి ఇటీవలే కాంగ్రెస్ నాయకుడు జానారెడ్డిని కలిశారు. పార్టీ మారకుండా ఆయనను బుజ్జగించినట్టు తెలిసింది. పెద్ద ఎత్తున కార్యకర్తలు, అభిమానులు కూడా కేసీఆర్ను కలిశారని పార్టీ వర్గాలు వెల్లడించాయి.
