- వెంటనే కేసీఆర్ను ప్రజల ముందు ప్రవేశపెట్టాలని కామెంట్
కరీంనగర్, వెలుగు: బీఆర్ఎస్ పార్టీ ఏ క్షణమైనా నిట్టనిలువునా చీలే అవకాశముందని బీజేపీ జాతీయ ప్రధాన కార్యదర్శి, ఎంపీ బండి సంజయ్ సంచలన వ్యాఖ్యలు చేశారు. కేసీఆర్ తన కొడుకును సీఎంగా చేయాలనే విషయాన్ని ప్రధాని మోదీ బయటపెట్టడంతో ఆ కుటుంబంలో చిచ్చు రగిలిందని, తన సడ్డకుడి కొడుకును కేసీఆర్ తన ఇంటికి కూడా రానివ్వడం లేదని విమర్శించారు. బీఆర్ఎస్ లో జరుగుతున్న పరిణామాలపై ఆ పార్టీ ఎమ్మెల్యేల్లో చర్చ జరుగుతోందని, ట్విట్టర్ టిల్లు నాయకత్వంలో ఎన్నికలకు వెళితే డిపాజిట్లు కూడా రావనే భయం పట్టుకుందన్నారు. కరీంనగర్లో బండి సంజయ్ బుధవారం మీడియాతో మాట్లాడారు. సీఎం కేసీఆర్15 రోజుల నుంచి బయటకు రావడం లేదని, కేటీఆర్ కేసీఆర్ను ఏమైనా ఇబ్బంది పెడుతున్నాడా? అనే డౌటొస్తోందన్నారు. దయచేసి కేసీఆర్ను బయటకు తీసుకొచ్చి ప్రెస్ తోనైనా మాట్లాడించాలని, తద్వారా తమకు కనిపించేలా చేయాలని కల్వకుంట్ల కుటుంబాన్ని కోరుతున్నట్లు తెలిపారు. ప్రధాని రెండ్రోజుల పర్యటనలో తెలంగాణ అభివృద్ధికి రూ.20 వేల కోట్లకుపైగా కేటాయించినందుకు ధన్యవాదాలు తెలిపారు. తెలంగాణే తమ కుటుంబమని చెబుతున్న కేటీఆర్ దళితుడిని సీఎంగా, పార్టీ అధ్యక్షుడిగా ఎందుకు చేయలేదని ప్రశ్నించారు.
మీ ఆస్తులు ఎన్ని రెట్లు పెరిగాయి?
కేసీఆర్ సీఎం కాకముందు ఆయన కుటుంబం ఆస్తి ఎంత? సీఎం అయ్యాక ఎన్ని రెట్లు పెరిగిందో బహిరంగంగా వెల్లడించే దమ్ముందా? అని సంజయ్ సవాల్ విసిరారు. కల్వకుంట్ల కుటుంబంలోని నలుగురి అవినీతి బాగోతం బయటపెడితే తెలంగాణ పట్ల విషం చిమ్మినట్లా? అని ప్రశ్నించారు. ఏ పిచ్చి కుక్క కరిస్తే కేసీఆర్ 2009 ఎన్నికల ఫలితాలు రాకముందే పిలవని పేరంటానికి వెళ్లాడో చెప్పాలన్నారు. బీఆర్ఎస్ మళ్లీ అధికారంలోకి వస్తే తెలంగాణను లూటీ చేస్తారన్నారు. బీఆర్ఎస్ ప్రభుత్వం హిందువుల పట్ల చులకన భావంతో ఉందని, కరీంనగర్లో మసీదుకు 8 ఎకరాలు కేటాయించి, మందిరానికి 5 ఎకరాలే ఎట్ల కేటాయిస్తారని ప్రశ్నించారు. తాను వాస్తవాలు మాట్లాడుతుంటే కొందరు ముస్లిం పెద్దలతో కలిసి సంజయ్కు ఓటేయొద్దని మాట్లాడిస్తారని, అయినా తాను భయపడనన్నారు. కరీంనగర్ లో బీజేపీ లేకపోతే బీఆర్ఎస్ సపోర్ట్ తో ఎంఐఎం కరీంనగర్ మొత్తాన్ని కబ్జా చేసి అరాచకాలకు పాల్పడే ప్రమాదముందని హెచ్చరించారు.
