నిజామాబాద్/బోధన్, వెలుగు: కేసీఆర్ రాజీనామా చేసి దళితుడిని సీఎం చేయాలని వైఎస్సార్టీపీ చీఫ్ షర్మిల డిమాండ్ చేశారు. మునుగోడు ఉప ఎన్నికలో కేసీఆర్, కేటీఆర్ కటౌట్లు పెట్టి ఎమ్మెల్యేలు మాంసం, మందు పంచుతున్నారని మండిపడ్డారు. తమ పార్టీ అధికారంలోకి వస్తే బెల్ట్ షాపులను రద్దు చేస్తామన్నారు.
షర్మిల పాదయాత్ర ఆదివారం నిజామాబాద్ జిల్లా బోధన్ నియోజకవర్గంలోని సాలంపాడ్, పెంటకూర్దు, బోధన్ పట్టణంలో సాగింది. పాదయాత్ర 181వ రోజు 2,600 కిలోమీటర్లు పూర్తి చేసుకుంది. సాలంపాడ్లో వైఎస్ విగ్రహాన్ని షర్మిల అవిష్కరించారు. బోధన్లోని అంబేద్కర్ చౌరస్తాలో బహిరంగ సభలో మాట్లాడారు. తమ పాలనలో సమస్యలు లేవని టీఆర్ఎస్ నేతలు చెప్పడం విడ్డూరంగా ఉందని, తనతో పాదయాత్ర చేసి సమస్యలు లేవని నిరూపిస్తే ముక్కు నేలకు రాసి యాత్ర నిలిపేస్తానని సవాల్ విసిరారు.
ప్రతి వర్గాన్ని వెన్నుపోటు పొడిచిన ఘనత కేసీఆర్ కే దక్కిందని, రైతు రుణమాఫీ నుంచి ఇంటికో ఉద్యోగం వరకు ప్రతి మాటా మోసమేనని ఫైర్అయ్యారు. పాలన చేతకాని నాయకుడిని సాగనంపేందుకు సిద్ధంగా ఉండాలని పిలుపునిచ్చారు.
జీతాలు రాక ఇబ్బందుల్లో కార్మికులు
బోధన్లోని నిజాం దక్కర్ షుగర్ ఫ్యాక్టరీని వంద రోజుల్లో తెరిపిస్తామని టీఆర్ఎస్ నేతలు హామీ ఇచ్చారని, ఇన్ని రోజులైనా ఫ్యాక్టరీని ఎందుకు తెరవడం లేదని షర్మిల ప్రశ్నించారు. కార్మికులకు జీతాలు కూడా ఇవ్వడం లేదని, దీంతో 2 వేల కుటుంబాలు ఆర్థికంగా సతమవుతున్నాయని చెప్పారు. కార్మికులు తెలంగాణలో పుట్టలేదా, ప్రత్యేక రాష్ట్ర ఉద్యమంలో పోరాడలేదా? అని నిలదీశారు. వెల్ఫేర్ హాస్టళ్లలో పురుగుల అన్నం పెడుతున్నారని, అక్కడి వారికి ఓట్లు ఉండవని హీనంగా చూస్తున్నారని ఆరోపించారు. ప్రజల కోసమే వైఎస్సార్టీపీ పార్టీని పెట్టామని, జనం పక్షాన కొట్లాడతామని, వైఎస్సార్ సంక్షేమ పథకాలకు మళ్లీ జీవం పోస్తామని షర్మిల హామీ ఇచ్చారు.
